Հայաստանի Ազգային վիճակագրական ծառայությունը հրապարակել է ընթացիկ տարվա հուլիսին սպառողական գների ինդեքսների վերաբերյալ համառոտ տեղեկատվությունը: Կախված համեմատության համար հիմքի ընտրությունից՝ գների դինամիկան տարբեր ուղղվածություն ունի:
Այսպես՝ եթե համեմատենք անցյալ տարվա դեկտեմբերի հետ, ապա հուլիսին գրանցվել է դեֆլյացիա (1,7 տոկոս՝ մինուս նշանով): Իսկ եթե հուլիսյան գները համեմատեք անցյալ տարվա նույն ամսվա հետ, ապա տարեկան ինֆլյացիան կստացվի «եվրաստանդարտների» մակարդակում (2,3 տոկոս):
Ըստ պաշտոնական տվյալների դատելու դեպքում սննդամթերքի գները գործնականում նախկին մակարդակին են մնացել: Տարեկան այս ապրանքները միջինը թանկացել են «միայն» 0,9 տոկոսով: Նշենք, որ միջին ամսական նվազագույն աշխատավարձը տարեկան հաշվարկով հունիսին աճել է խորհրդանշական 1,3 տոկոսով, իսկ միջին կենսաթոշակը մնացել է նախկին մակարդակում:
Բնակչության սպառողական ծախսերի ընդհանուր գումարում սննդամթերքի տեսակարար կշիռը (ոչ ալկոհոլային խմիչքների հետ) հասնում է 41 տոկոսի: Սա միջինում: Հասկանալի է, որ «միայն աշխատավարձով» ապրող շարքային վարձու աշխատողների եւ բնակչության եկամտի ցածր մակարդակով այլ շերտերի ծախսերի գումարում սնունդի բաժինը զգալիորեն մեծ է վերեւում նշված ցուցանիշից: Բնակչության այս խմբի եկամուտների ցածր մակարդակը (իրական աճի բացակայությամբ) ինչ-որ չափով զսպում է սննդամթերքի գնաճը:
ԵՏՄ առանձին երկրներում հուլիսին պատկերը հետեւյալն է: Ռուսաստանում նույնպես տարեկան ինֆլյացիան համեմատաբար ցածր մակարդակում էր՝ 2,5 տոկոս, Ղազախստանում մի փոքր բարձր էր՝ 5,9 տոկոս:
Սմբատ Գրիգորյան