«Ծառուկյան» խմբակցության պատգամավոր Գեւորգ Պետրոսյանի՝ մանդատից հրաժարվելու դիմումը խմբակցության ղեկավար Գագիկ Ծառուկյանը չի ընդունել։ Այս մասին Գագիկ Ծառուկյանը հայտարարել է այսօր՝ օգոստոսի 7-ին, հրավիրած նիստում։
Հիշեցնենք, որ Գեւորգ Պետրոսյանը մանդատից հրաժարվելու դիմում էր ներկայացրել իր գործընկեր Նաիրա Զոհրաբյանին կոշտ քննադատելուց հետո։ Պետորսյանն իր դժգոհությունն էր հայտնել Երեւանի ավագանու ընտրություններում Նաիրա Զոհրաբյանի թեկնածությունն առաջադրելու կապակցությամբ, ինչի մասին գրառել էր ֆեյսբուքում։ Նրա գրառումից հետո տեղեկություններ եղան, որ Գեւորգ Պետրոսյանն ական է խմբակցությունում եւ համագործակցելու է այլ քաղաքական ուժերի հետ, ինչից հետո վերջինս մանդատից հրաժարվելու դիմում էր ներկայացրել խմբակցության ղեկավարին՝ ապացույց այն բանի, որ նման մտայնություն չունի եւ իր անձնական դիրքորոշումն է հայտնել։
«Ես ձեզ, որպես իմ գործընկերներ, ուզում եմ հարցնեմ՝ որեւիցե մեկը կարա՞ մտածի, որ Գեւորգը կարա ծախված լինի, ական լինի, պատվեր կատարի»,– պատգամավորներին հարցրել է Գագիկ Ծառուկյանը, ինչին բացասաբար են պատասխանել նրանք։