ՀՀ երկրորդ նախագահ Ռոբերտ Քոչարյանի կալանավորման վերաբերյալ Հայ հեղափոխական դաշնակցության (ՀՅԴ) հայտարարության բովանդակությունը ինձ համար անհասկանալի է։ Այս մասին այսօր՝ օգոստոսի 7-ին, «Ազատության» ֆեյսբուքյան ասուլիսին հայտարարեց փոխվարչապետ Տիգրան Ավինյանը։ «ՀՅԴ–ն, կազմելով կառավարության մի մաս, պետք է հստակ իմանա գործադիր եւ դատական իշխանությունների միջեւ ինչպիսի փոխհարաբերություններ են, արդյոք կան ճնշումներ դատական իշխանության վրա, թե ոչ»,–նշեց նա։
Ավինյանը հիշեցրեց՝ իրենց առաջին իսկ օրից ֆիքսել են, որ գործադիր իշխանությունը որեւէ ճնշում չի գործադրելու դատական իշխանության վրա։
Հիշեցնենք, որ ՀՅԴ–ն հայտարարություն էր տարածել, որում նշել էր, որ «Հայաստանի երկրորդ նախագահ Ռոբերտ Քոչարյանին եւ նախկին իշխանությունների այլ ներկայացուցիչների՝ սահմանադրական կարգը տապալելու մեղադրանք ներկայացնելը խիստ մտահոգիչ է եւ կարող է մեկնաբանվել որպես քաղաքական հալածանք»։