Եվրոպական հանձնաժողովը փորձում է պարզաբանումներ ստանալ Սաուդյան Արաբիայից քաղաքացիական ակտիվիստների ձերբակալման կապակցությամբ, սակայն Բրյուսելը մտադիր չէ միջամտել Օտավայի եւ Էր-Ռիյադի միջեւ ծագած դիվանագիտական սկանդալին, հաղորդում է Reuters-ը:
Պատասխանելով Կանադայի եւ Սաուդյան Արաբիայի միջեւ առաջացած լարվածության խնդրին՝ ԵՀ-ի ներկայացուցիչ Մայա Կոսյանչիչը նշել է, որ ԵՀ-ն փորձում է պարզաբանումներ ստանալ Էր-Ռիյադից ձերբակալությունների վերաբերյալ, ցանկանում է հասկանալ, թե ինչում են մեղադրվում ակտիվիստներն ու արդար դատաքննություն ապահովել: Ինչ վերաբերում է Կանադայի եւ Սաուդյան Արաբիայի միջեւ հարաբերություններին, ապա նա նշեց. «Մենք չենք մեկնաբանում երկկողմ հարաբերությունները: Մենք կողմ ենք երկխոսությանը»:
Հիշեցնենք, որ Սաուդյան Արաբիան հետ էր կանչել իր դեսպանին Կանադայից եւ արտաքսել էր Կանադայի դեսպանին թագավորությունում Կանադայի կողմից ակտիվիստներին ազատ արձակելու մասին հնչեցված կոչերից հետո: Էր Ռիյադում սա դիտարկել են որպես միջամտություն երկրի ներքին գործերին: