ԱՄՆ պաշտպանության նախարար Ջեյմս Մեթիսն աջակցություն է հայտնել ԱՄՆ զինված ուժերի ներսում տիեզերական ուժերի օպերատիվ հրամանատարության ստեղծման գաղափարին, հաղորդում է «ՌԻԱ Նովոստի»-ն:
«Մենք պետք է տիեզերքը դիտարկենք որպես ռազմական գործողությունների զարգացող թատրոն: Օպերատիվ հրամանատարության ստեղծումը, իհարկե, տարբերակներից մեկն է»,- ABC News-ն մեջբերում է Պենտագոնի ղեկավարի խոսքերը:
Հունիսին Թրամփը Պենտագոնին հանձնարարել էր զորքերի առանձին տեսակ՝ Ռազմատիեզերական ուժեր ստեղծել՝ տիեզերքում ամերիկյան ենթակառուցվածքի անվտանգության համար մտավախության հետ կապված:
Մեթիսի խոսքով՝ գերատեսչությունն ամբողջոթյամբ աջակցում է այս նախաձեռնությանը եւ աշխատում է գաղափարի իրականացման վրա: Պենտագոնի ղեկավարը նշել է, որ տիեզերքը «նույնպիսի դաշտ է պատերազմի համար, ինչպես հողը, օդը եւ ծովը»:
Ամերիկյան տիեզերական օբյեկտների խոցելիությունը նախկինում մատնանշվել էր NASA-ի տնօրեն Ջիմ Բրայդենստանի կողմից: Նրա խոսքով՝ GPS ազդանշանի կորուստը սպառնում է ԱՄՆ-ին «կենսագործունեության դադարեցմամբ»:
Այժմ ԱՄՆ-ի Զինված ուժերի կազմում կա վեց աշխարհագրական (Աֆրիկյան, Եվրոպական, Խաղաղօվկիանոսյան, Հյուսիսային, Հարավ, Կենտրոնական) եւ չորս ֆունկցիոնալ (Ռազմավարական, Տրանսպորտային, Կիբերհրամանատարություն եւ Հատուկ գործողությունների հրամանատարություն) հրամանատարություն:
