«Սասնա ծռերի» անդամ Գագիկ Եղիազարյանի խափանման միջոցը փոխելու համար պաշտպանն այսօր՝ օգոստոսի 8-ին, միջնորդություն ներկայացրեց դատարանին:
Երեւանի ընդհանուր իրավասության դատարանի Շենգավիթի նստավայրից NEWS.am-ի թղթակիցը հաղորդում է, որ Գագիկ Եղիազարյանի համար անձնական երաշխավորություն են ներկայացրել «Ծառուկյան» խմբակցության պատգամավորներ Վահե Էնֆիաջյանը, Շաքե Իսայանը եւ Հակոբ Նազարյանը:
Նրանցից յուրաքանչյուրը 500 հազարական դրամ են մուծել դատարանին եւ անձամբ են ներկայացել դատարան:
Նախագահող դատավոր Մեսրոպ Մակյանը հեռացավ խորհրդակցական սենյակ, որոշումը կհրապարակվի 12:30-ին:
Ավելի վաղ տեղեկացրել էինք, որ Գագիկ Եղիազարյանի համար նախկինում էլ էր խափանման միջոցը փոխելու միջնորդություն ներկայացվել, որը Մեսրոպ Մակյանը մերժել էր՝ պատճառաբանելով, որ Եզիազարյանը ազատության մեջ գտնվելով պատշաճ վարքագիծ չի դրսեւորի:
Նշենք, որ Մեսրոպ Մակյանի վարույթում քննվում են ամբաստանյալներ Պավել Մանուկյանի, Վարուժան Ավետիսյանի, Արայիկ Խանդոյանի, Արեգ Կյուրեղյանի, Գագիկ Եղիազարյանի, Մխիթար Ավետիսյանի, Էդվարդ Ներսիսյանի, Սեդրակ Նազարյանի, Սմբատ Բարսեղյանի, Արմեն Բիլյանի վերաբերյալ գործը: