Գերմանիայի կողմից Թուրքիայի քաղաքացիների համար հաստատված վիզային կանոնները չեն հակասում ԵՄ օրենսդրությանը նաեւ ընտանիքների վերականգնման առումով։ Համապատասխան վճիռն ընդունվել է Լյուքսեմբուրգում Եվրոպական դատարանի կողմից, փոխանցում է DW–ն։
Քննվել է Շտուտգարդ քաղաքի իշխանությունների գործն ընդդեմ Թուրքիայի քաղաքացու, որը դիմել էր Գերմանիայում բնակություն հաստատելու համար, որ միանար քաղաքում ապրող ամուսնու հետ։ Նրան 2014 թվականին մերժել էին գերմաներենի բավարար գիտելիքներ չունենալու եւ Գերմանիա մուտքի ազգային վիզա չունենալու պատճառով։
Անկարայում Գերմանիայի դեսպանատունը Թուրքիայի քաղաքացուն մուտքի վիզա չէր տրամադրել, այն ժամանակ նա շենգենյան վիզա էր ստացել Նիդերլանդներ այցելելու համար, որտեղ ապրում էր նրա քույրը եւ այնտեղից էլ մեկնել էր Գերմանիա։
Կինը պնդում էր, որ առողջական վիճակի պատճառով ամուսնու օգնության կարիքն ունի։
Եվրոպական դատարանը վճռել է, որ Բեռլինի վիզային պահանջներն արդարացված են այնքան ժամանակ, քանի դեռ միտված են իմիգրացիոն վերահսկողության արդյունավետության ապահովմանն ու միգրացիոն հոսքերի կարգավորմանը։
