Վրաստանի եւ Թուրքիայի միջեւ ստեղծված իրավիճակը կարող է ընդհատել վրաց-թուրքական այն համաձայնագրի ստորագրումը, որի արդյունքում պետք է վերականգնվեն Թուրքիայի տարածքում գտնվող չորս վրացական վանքերը, ինչպես նաեւ Վրաստանի տարածքում գտնվող մահմեդական մզկիթները եւ կառուցվի մզկիթ: Այս մասին գրում է վրացական Journalist.ge-ն:
Նշվում է, որ Վրաստանի ղեկավարությունն, ի սկզբանե, թաքցնում էր պայմանագրի բովանդակությունը եւ արգելում հեռուստաընկերություններին տեսանյութեր պատրաստել պատմական Տաո-Կլարջեթիում գտնվող հուշարձանների անմխիթար իրավիճակի մասին: Իսկ այն մասին, թե ինչ էր պահանջում Թուրքիան Վրաստանից վրացական կոթողների վերականգնման փոխարեն, ընդհանրապես խոսք չէր գնում:
Պարբերականի ներկայացմամբ, թուրք-վրացական պաշտոնական հանդիպումները գաղտնի էին տեղի ունենում մինչեւ այն պահը, երբ Վրաստանի Պատրիարքությունը հանդես եկավ պաշտոնական հայտարարությամբ, նշելով, իրենք համաձայն չեն թուրքական կողմի ներկայացրած պայմաններին:
Վրացական կողմն այդ ժամանակ ուզում էր, որպեսզի վերականգնվի Վրաստանի պատմական Լազեթիում գտնվող «Արդաշեն» մենաստանը եւ պատմական Խախուլիից դուրս բերվի մզկիթը:
Վրաստանի մշակույթի նախարար, Նիկա Րուրուան այս թեմայի վերաբերյալ դեռեւս մեկնաբանություն չի տվել: Ինչ վերաբերում է թուրքական կողմին, ապա նրանց հետ բանակցությունները ձգձգվում են, ինչն էլ Վրաստանի եւ Թուրքիայի միջեւ տարաձայնությունների առիթ է դառնում:
«Վրաստանի նախագահ Միխայիլ Սահակաշվիլին իր վերջին հայտարարությունում, ի տարբերություն Վրաստանում գտնվող հայկական եկեղեցիների, Թուրքիայի տարածքում գտնվող վրացական հուշարձանները թուրքական է համարում, ինչպես նաեւ ոչ մի արտառոց բան չի տեսնում նրանում, որ վրացական հուշարձանների վերականգնման փոխարեն Բաթումիում կառուցում է Ազիզիեի մզկիթը»,- գրում է Journalist.ge-ն:
Հիշեցնենք, որ եթե թուրք-վրացական այդ համաձայնագիրը ստորագրվի, ապա Թուրքիան վերանորոգելու է հայաբնակ Սամցխե-Ջավախքում գտնվող կիսավեր մզկիթը:
