Ռոբերտ Քոչարյանը կալանքի տակ կմնա: Գլխավոր դատախազությունը մերժել է երկրորդ նախագահի խափանման միջոցը փոխելու վերաբերյալ Ազգային ժողովի 45 պատգամավորների միջնորդությունը: Դատախազությունում շարունակում են պնդել, որ այլ խափանման միջոցի ընտրությունն ի զօրու չէ երաշխավորել մեղադրյալի պատշաճ վարքագծով պայմանավորված քննության անխափան ընթացքը: Նշենք, որ Ռոբերտ Քոչարյանի խափանման միջոցը փոխելու ստորագրահավաքին միացել են պատգամավորներ ՀՀԿ, ՀՅԴ եւ «Ծառուկյան» խմբակցություններից:
Կալանավորման վերաբերյալ առաջին ատյանի դատարանի որոշումը բողոքարկել է նաեւ Քոչարյանի փաստաբանների խումբը: Վերաքննիչ դատարանում բողոքը կքննվի վաղը՝ օգոստոսի 9-ին:
Դատախազության որոշումը վրդովել է ՀՀԿ խոսնակ Էդուարդ Շարմազանովին, ով նույնպես ստորագրել է երաշխավորագիրը: Նա տպավորություն է ստացել, որ ընտրովի արդարադատություն է իրականացվում: Շարմազանովը, միաժամանակ, դժվարացել է ասել, թե որն է լինելու ՀՀԿ-ի հաջորդ քայլը Ռոբերտ Քոչարյանին պաշտպանելու գործում: Նշել է, որ այդ մասին կհայտնեն Վերաքննիչ դատարանի որոշումից հետո։
Նախկին վարչապետ Հովիկ Աբրահամյանի եղբայրը՝ Հենրիկ Աբրահամյանը ձերբակալվել է: Նրան կասկածում են ապօրինի կերպով հրազեն ու ռազմամթերք ձեռք բերելու եւ պահելու մեջ: Մարտի 1-ի գործի շրջանակում Ազգային անվտանգության ծառայությունը տվյալներ է ստացել, որ Արարատի մարզի Մխչյան գյուղում նախկին մեխանիկա-վերանորոգման գործարանում ապօրինի մեծ քանակությամբ զենք եւ ռազմամթերք է պահվում: Խուզարկության ընթացքում տվյալները հաստատվել են: Հաղորդագրության համաձայն՝ գործարանը փաստացի պատկանում է Հովիկ Աբրահամյանին, սակայն ձեւակերպված է Ամբիկ Գեւորգյանի անվամբ: Վերջինը նույնպես ձերբակալվել է: Իրավապահները փորձում են պարզել զենքերի ձեռքբերման աղբյուրները, ինչպես նաեւ այն, արդյո՞ք 2008 թվականի մարտի 1-ին եւ 2-ին դրանք գործադրվել են:
«Սասնա ծռերի» գործով դատական նիստն այսօր լարված մթնոլորտում է անցել: Ամբաստայալներից Գագիկ Եղիազարյանն ազատ է արձակվել. «Ծառուկյան» խմբակցության 3 պատգամավորներ էին երաշխավորել:
Խափանման միջոցը փոխելու միջնորդություն է ներկայացրել նաեւ Պավլիկ Մանուկյանի պաշտպան Ազատ Շահբազյանը: Մեղադրողը, սակայն, առարկել է՝ միջնորդելով նախ հարցաքննել Պավլիկ Մանուկյանին՝ կապված նրա աղմկահարույց հայտարարության հետ, հետո նոր անդրադառնալ խափանման միջոցը փոխելու միջնորդությանը: Պավլիկ Մանուկյանն ասել է՝ պնդում է նախկինում արված հայտարարությունը. պատահական կրակոցն արձակվել է Էդվարդ Գրիգորյանի կողմից, իսկ բանկոմատը բացել է Մխիթար Ավետիսյանը: Նա նաեւ պնդել է, որ անձամբ է ներկա եղել կրակոցի պահին, որից զոհվել է ոստիկան Գագիկ Մկրտչյանը, իսկ բանկոմատը բացելուն ականատես չի եղել: Մանուկյանն այսօր եւս մեկ աղմկահարույց հայտարարություն է արել. ինքն իր անձնական զենքով է մտել ՊՊԾ գունդ եւ դատավարությունից հետո պահանջելու է վերադարձնել այն:
Խորհրդակցական սենյակից վերադառնալով՝ դատարանը մերժել է Պավլիկ Մանուկյանի խափանման միջոցը փոխելու միջնորդությունը՝ պատճառաբանելով, որ ազատության մեջ գտնվելով՝ նա կազդի դատավարության մյուս մասնակիցների վրա:
Երեւանի քաղաքապետի թեկնածու Հայկ Մարությանն այսօր հանդիպել է այդ պաշտոնում իրեն առաջադրած «Քաղաքացիական պայմանագիր» կուսակցության ակտիվի հետ: Հանդիպումն արգելվել է տեսանկարահանել. դերասանն ասել է՝ կուսակցական հարցեր են քննարկելու: Նա նաեւ հրաժարվել է լրագրողների հարցերին պատասխանել՝ բացատրելով, թե ինչու:
Իսկ Երեւանի քաղաքապետի պաշտոնին հավակնում է նաեւ ճարտարապետ Անահիտ Թարխանյանը: Նա տեղեկացրել է, որ իր թեկնածությունը որոշել են առաջադրել «Երեւանի հանրություն» նախաձեռնություն ձեւավորած հասարակական կազմակերպություններն ու «ԳԱԼԱ» կուսակցությունը:
Երեւանի քաղաքապետարանը 12 մլն դրամով տուգանել է «Սանիթեք» ընկերությանը: Քաղաքապետարանից տեղեկացնում են, որ ընկերությունը պատշաճ չի կատարել պայմանագրով սահմանված ծառայությունները: Հայտնաբերված թերությունների մասին «Սանիթեք»-ին տեղեկացրել են, նաեւ դրանք վերացնելու համար ժամանակ տվել: Ընկերությունը, սակայն, ոչ բոլոր դեպքերում է վերացրել թերությունները: «Սանիթեք»-ին նաեւ զգուշացվել է. ծառայությունները պայմանագրին համապատասխան չիրականացնելու դեպքում ավելի կոշտ միջոցներ են կիրառվելու:
Երեւանի Իսակովի պողոտայում կեսգիշերն անց արտակարգ պատահար է տեղի ունեցել: «Մերսեդես» մակնիշի ավտոմեքենան մխրճվել է պողոտայում գործող CPS բենզալցակայանի մեջ: Բռնկված հրդեհը տարածվել է բենզալցակայանի ամբողջ տարածքում: Կրակը հաջողվել է մարել, սակայն բենզալցակայանի պահուստային տարաներից վառելիքի արտահոսքը երկար ժամանակ շարունակվել է, փականներն էլ չեն գործել: Պատահարի հետեւանքով Իսակովի պողոտայում՝ դեպի «Զվարթնոց» օդանավակայան տանող եւ հետադարձ ճանապարհները երկար ժամանակ խցանված են եղել:
Օգոստոսի 8-ին դոլարի ու եվրոյի վերելքը շարունակվել է, իսկ ռուբլին էժանացել է: Դոլարի փոխարժեքը կազմել է 481 դրամ, եվրոյինը՝ 558, ռուբլունը՝ 7 դրամ 51 լումա, ֆունտինը՝ 621 դրամ:
Օգոստոսի 9-ին հանրապետության շրջանների զգալի մասում սպասվում է անձրեւ եւ ամպրոպ, առանձին հատվածներում՝ կարկուտ: Օդի ջերմաստիճանը 2-3 աստիճանով կնվազի: Երեւանում նույնպես վաղը տեղումներ են սպասվում: Մայրաքաղաքում գիշերը կդիտվի +20+22, ցերեկը՝ +32+34 աստիճան տաքություն: