Ընթացիկ տարվա առաջին կիսամյակի արդյունքներով՝ Ferrari-ն ամենաշահութաբեր ապրանքանիշն է. յուրաքանչյուր վաճառված մեքենայից՝ 69.000 եվրո: Համեմատության համար նշենք, որ Jaguar Land Rover-ի դեպքում այս ցուցանիշը 800 եվրո է կազմում: Այս մասին ասված է գերմանացի պրոֆեսոր Ֆերդինանդ Դուդենհեֆերի հետազոտությունում, հաղորդում է Motor-ը:
Դրանում նաեւ նշվում է, որ գերմանական պրեմիում դասի ապրանքանիշերից ամենաեկամտաբերը Porsche-ն է. յուրաքանչյուր վաճառված մեքենայից ընկերությունը շուրջ 17.000 եվրո է ստանում, իսկ Audi-ն, BMW-ն եւ Mercedes-Benz-ը՝ շուրջ 9.000: Maserati-ի դեպքում այս ցուցանիշը 5.000 եվրո է:
Ավտոարտադրողների շրջանում նաեւ կան այնպիսիք, որոնք վնաս են կրում: Այսպես, վաճառված յուրաքանչյուր Bentley-ն ընկերությանը 17.000 եվրո է արժենում, ինչը բացատրվում է էլեկտրական ուժային սարքավորումների եւ տեխնոլոգիաների մշակման համար զգալի ներդրումներով: Իսկ Tesla-ն յուրաքանչյուր վաճառված մեքենայից 11.000 եվրո է կորցնում:
Անցյալ տարի նման հետազոտություն է անցկացրել Bloomberg-ը եւ նույն արդյունքներն արձանագրել. օպերացիոն շահույթի մասով առաջատարները նույնպես Ferrari-ն եւ Porsche-ն էին: