Ստացված նախնական օպերատիվ աշխատանքի արդյունքում ստացվել են տվյալներ, որ թաքցված է զենք, որը, հնարավոր է, առնչություն ունի Մարտի 1–ի իրադարձությունների ժամանակ կիրառված զենքի հետ։ Այս մասին այսօր՝ օգոստոսի 9-ին, լրագրողների հետ զրույցում կրկնեց ԱԱԾ տնօրեն Արթուր Վանեցյանը` անդրադառնալով երեկ ԱԱԾ–ի՝ նախկին վարչապետ Հովիկ Աբրահամյանին պատկանող տարածքում գտնված զենքին։
«Դա դեռ վարկած է, որը դեռ պետք է ստուգվի։ Դրա արդյունքները պարզ կլինեն համապատասխան փորձաքննությունից հետո։ Նախնական օպերատիվ տվյալներով, կա վարկած»,– նշեց Վանեցյանը՝ պատասխանելով հարցին, թե արդոք հայտնաբերված զենքից կրակել են մարդկանց ուղղությամբ։
Հարցին, թե կասկածներ ունի, որ Հովիկ Աբրահամյանի սեփականության տարածքից հայտնաբերված զենքից կրակել են Մարտի 1–ի դեպքերի ժամանակ, կամ Աբրահամյանը հրաման է արձակել, որ իր կողմնակիցները կրակեն Վանեցյանն ասաց. «Ես նման մանրուքներ այս պահին չեմ կարող ասել, միայն կարող եմ ասել, որ մենք հայտնաբերել ենք զենքեր, որոնք մեր նախնական օպերատիվ տվյալների համաձայն հնարավոր է օգտագործվել են Մարտի 1–ի եւ 2–ի դեպքերի ժամանակ։ Օգտագործվել են այն անձանց կողմից, որոնք որ երբեք ներառված չեն եղել իրավապահ համակարգում։
Հարցին՝ հրավիրվել է արդոք Հովիկ Աբրահամյանը հարցաքննության, թե՝ ոչ, Վանեցյանն ասաց, որ այդ հարոցով պետք է դիմել ՀՔԾ–ին։