ՀՀ երկրորդ նախագահ, երկրի սահմանադրական կարգը խախտելու մեջ մեղադրվող Ռոբերտ Քոչարյանը ներկա է խափանման միջոցը փոխելու բողոքի Վերաքննիչ դատարանի նիստին: Այս մասին NEWS.am-ին հայտնեց Քոչարյանի շահերի պաշտպան Հայկ Ալումյանը:
Նա տեղեկացրեց, որ նիստն արդեն սկսվել եւ ընդմիջվել է, որից հետո նորից կշարունակվի բողոքի քննությունը:
Վերաքննիչ բողոքը քննող դատավորն Ալեքսանդր Ազարյանն է:
Նշենք, որ մինչ այս նիստը ԱԺ 45 պատգամավոր Քոչարյանի խափանման միջոցը փոխելու միջնորդություն էր ներկայացրել ՀՀ գլխավոր դատախազին: Միջնորդությունը, սակայն, նախօրեին մերժվել է:
Ավելի վաղ NEWS.am-ը հայտնել էր, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քրգործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին եւ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը:
Միքայել Հարությունյանի նկատմամբ հետախուզում է հայտարարվել, Յուրի Խաչատուրովը 5 մլն գրավի դիմաց ազատ է արձակվել, իսկ Ռոբերտ Քոչարյանը դատարանի որոշմամբ կալանավորվել է: