Քաղաքական փոփոխություններից հետո քաղաքացիները շատ են դժգոհում, որ տան համար բերվող ապրանքները սահմանին պահանջում են մաքսազերծել կամ թույլ չեն տալիս անցկացնել: Այս մասին այսօր՝ օգոստոսի 9-ին, Կառավարության նիստի ժամանակ ասաց վարչապետ Նիկոլ Փաշինյանը:
«Նախկինում եղել է եւ այժմ էլ հնարավոր է՝ տեղ-տեղ պահպանված լինի այն արատավոր պրակտիկան, որ ավել սահմանաչափերն անցկացնելու համար որոշակի կոռուպցիոն գործարքներ են տեղի ունենում: Մեր ազգային առանձնահատկությունները չպետք է մոռանանք, մենք սիրում ենք այստեղ-այնտեղ գնալիս նվերներ բերել մեր մորաքույրների, հորաքույրների, հարեւանների համար: Դրա համար է չափաքանակն ավելացվում»,- ասաց Նիկոլ Փաշինյանը:
Նշենք, որ Կառավարության այսօրվա որոշմամբ, անհատ ձեռնարկատեր չգրանցված ֆիզիկական անձինք կկարողանան շատ ավելի մեծ ծավալով որոշակի ապրանքներ ներմուծել Հայաստան՝ առանց մաքսային ձևակերպումների. սահմանված սահմանաչափերը բարձրացվում են։ https://news.am/arm/news/465684.html
ՀՀ առաջին փոխվարչապետ Արարատ Միրզոյանին կարծես զարամցրել է որոշակի ապրանքների դեպքում սահմանված չափաքանակը. «Որքան էլ հարեւաններ ու բարեկամներ ունենանք, 1 կգ ծամոնը դժվար է պատկերացնել... դրա փոխարեն բենզինն ընդամենը 10 լիտր է»:
Նիկոլ Փաշինյանը կատակեց. «Էս էն ծամոններից ա, որ լցնում ես բենզինի մեջ, բենզինը շատանում է»: ՊԵԿ նախագահն էլ արձագանքեց. «Հաստատ սարի ծամոնը չի»:
Ծամոնի թեման շարունակեց նաեւ գյուղատնտեսության նախարար Արթուր Խաչատրյանը. «Քանի՞ անգամ կարող է անձը բերել ծամոն: Ասենք՝ օրական 5 կգ, շաբաթական 35 կգ, կստացվի՝ ամբողջ ազգը կսկսի ծամել»:
Դավիթ Անանյանը նշեց, որ այս չափաքանակները վերաբերում են 1 անգամ սահմանահատմանը:
Նշենք, որ ամբողջական ցանկն առաջիկայում կհրապարակվի ՊԵԿ կայքում: