ԱՄՆ-ն ցանկանում է տիեզերական տարածքում հակահրթիռային պաշտպանության (ՀՀՊ) սենսորային շերտ տեղադրել, հայտնում է Defense News-ը՝ վկայակոչելով ՀՀՊ հարցերով գործակալության տնօրեն, գեներալ-լեյտենանտ Սեմ Գրիվզի հայտարարությունը Հանսթվիլում (Ալաբամա նահանգ) տեղի ունեցած տիեզերական պաշտպանության թեմայով համաժողովում:
Գրիվզի խոսքով՝ գլխավորն այն է, որ գոյություն ունի տիեզերքում այդպիսի սենսորային հաղորդիչների ծավալման անհրաժեշտության «լուրջ քննարկում» եւ ըմբռնում: Դրանից բացի, դեռ պետք է որոշել այդպիսի սենսորներին ներկայացվող պահանջները եւ դրանք ձեռք բերելու գործընթացը:
Ալաբամայում հանդիպման ժամանակ Գրիվզը ներկայացրել է տեսլականը, թե տիզերքում ՀՀՊ սենսորային շերտն ինչպես կկարողանար գործել: Այսպես՝ սենսորներն ունակ կլինեին հայտնաբերել եւ հետեւել հիպերձայնային սպառնալիքները եւ այլ ավելի բարդ թիրախները, ինչպես նաեւ հրթիռները որսալ օդ բարձրանալու կամ թռիչքի փուլում:
Գրիվզի խոսքով՝ իր գործակալությունը «դեմ չէ» տիեզերական բազավորման ՀՀՊ համար որսող հրթիռներ պատրաստելուն: Նա հավելել է, որ գործակալությունը Պենտագոնի հետ բանավեճ է վարում եւ շեշտել է, որ ներկայումս տարբերակներ են մշակում նման պոտենցիալի իրականացման համար: