Հալեպի նահանգապետ Ալի Ահմադ Մանսուրան հունվարի 30-ին Հալեպում ՀՀ գլխավոր հյուպատոս Աշոտ Մանուկյանի հետ քննարկել է Հայաստանի ու Սիրիայի միջեւ կրթական դիպլոմների ճանաչման հարցերը:
ԱԳՆ մամուլի ծառայությունից NEWS.am-ին հայտնում են, որ այդ հանդիպմանը քննարկվել է նաեւ Սիրիայում բնակություն հաստատած ՀՀ քաղաքացիների` սիրիական նախակրթական հաստատություններում ու վարժարաններում դասավանդելու թույլտվություն ստանալու խնդիրը:
Աշոտ Մանուկյանը նահանգապետին հայտնել է, որ հյուպատոսական շրջանում ապրում է շուրջ 500 ՀՀ քաղաքացի, հիմնականում` կանայք, որոնց մի մասը, ունենալով բարձրագույն կրթություն, չի կարողանում աշխատել ուսումնական հաստատություններում, քանի որ առկա են բազմաթիվ խոչընդոտներ:
Ալի Ահմադ Մանսուրան խոստացել է զբաղվել այդ հարցերով: Բացի այդ, պայմանավորվածություն ձեռք բերվեց, որ հյուպատոսության կողմից ներկայացվող թեկնածուներին աշխատանքի տեղավորման հարցերով կաջակցի անձամբ նահանգապետը:
Նահանգապետը խոստացել է նաեւ Հայաստանի բուհերի դիպլոմների ճանաչման վերաբերյալ հարցը քննարկել Սիրիայի բարձրագույն կրթության նախարար դոկտոր Ղիյաս Բարաքաթի հետ, նախքան նախարարի` առաջիկայում Հայաստան նախատեսվող այցելությունը:
Հանդիպման ընթացքում գլխավոր հյուպատոսը նահանգապետին փոխանցել է Արարատի մարզպետի` Հայաստան այցելելու հրավերը, որն ընդունվել է գոհունակությամբ:
