Վրաստանի պատրիարքարանի բարձրաստիճան հոգեւորականի սպանության նախապատրաստության համար 9 տարվա ազատազրկման դատապարտված Գեորգի Մամալաձեի պաշտպանությունը դիմել է երկրի նախագահին՝ նրան ներելու խնդրանքով, հայտարարել է նրա փաստաբան Գեորգի Պանցուլայան:
«Մենք նախագահի աշխատակազմ տեղեկություններ ենք ուղարկել բոլոր իրավական խախտումների մասին, որոնք գրանցվել են այս գործում…Վրաստանի նախագահը կունենա ամբողջ տեղեկատվությունը, որը նրան թույլ կտա օբյեկտիվ որոշում ընդունել»,- լրագրողներին ասել է Պանցուլայան:
Փաստաբանը վստահ է, որ երկրի նախագահ Գեորգի Մարգվելաշվիլին Մամալաձեին անպայման կների:
Մամալաձեին ձերբակալել էին 2017 թվականի փետրվարի 10-ին Թբիլիսիի օդանավակայանում, որտեղից նա մեկնում էր Գերմանիա, որպեսզի միանա պատրիարքի ներկայացուցիչներին, այդ թվում՝ նաեւ Տետրուաշվիլիին: Պատրիարքի շրջապատը գտնվում էր Բեռլինի կլինիկայում, որտեղ Իլյա Երկրորդին վիրահատել էին: Մամալաձեի ուղեբեռում նատրիումի ցիանիդ էին հայտնաբերել, որը դատախազության վարկածով՝ նա նախատեսում էր օգտագործել բարձրաստիճան հոգեւորականի սպանության համար: 2017-ի սեպտեմբերին Թբիլիսիի քաղաքային դատարանը նրան դատապարտել էր 9 տարվա բանտարկության, իսկ փետրվարին դատավճիռն անփոփոխ էր թողել վերաքննիչ դատարանը:
