Զինծառայողների ապահովագրության հիմնադրամն այսօր՝ օգոստոսի 9-ին, ընդունեց 2015 եւ 2016 թվականներին զոհված կամ վիրավորված զինծառայողներին եւ նրանց ընտանիքներին հատուցման գումարների վճարման վերաբերյալ որոշումը:
Որոշման նախագիծը ներկայացրեց հիմնադրամի գործադիր տնօրեն Վարուժան Ավետիքյանը։
«Հաշվի առնելով, որ հիմնադրամի շահառուները պետությունից ֆինանսական աջակցություն են ստանում, առաջարկում ենք, որ վճարումներ կատարվեն ամսական վճարումներով՝ 20 տարի ժամկետով, վճարվի նաեւ տարբերությունը։ Օրինակ, եթե սպան մահացել է, եւ նրա ընտանիքը պետությունից ստանում է 60 հազար դրամ աջակցություն, եթե հիմնադրամում օրենսդրությամբ նա կստանար 300 հազար, առաջարկվում է վճարել 300 հազարի եւ 60 հազարի տարբերությունը՝ 240 հազարը։ Առաջարկվում է նաեւ այդ դեպքերի համար վճարել 100 հազար դրամ միանվագ վճարը, եթե զոհված կամ վիրավորված զինծառայողը ունի երեք եւ ավելի երեխա։ Ժամկետները սահմանվեն մինչեւ հոկտեմբերի 1-ը, որ ՊՆ ներկայացվի դեպքերի հետ կապված փաստաթղթերը, գործընթացի ավարտի համար թիրախային ժամկետ սահմանվի հոկտեմբերի 15-ը»,- ասաց Վարուժան Ավետիքյանը:
Նա նաեւ հավաստիացրեց՝ «Զինծառայողների ապահովագրության հիմնադրամ»-ի բոլոր շահառուները, անկախ նրանից, քաղաքում են բնակվում, թե գյուղական վայրում, պատշաճ կարգով կստանան իրենց հասանելիք աջակցությունը.«Անկախ նրանից, շահառուն գտնվում է Երեւանում, թե գյուղական վայրում, միեւնույն է, նա ստանալու է հիմնադրամի կողմից հատկացված հատուցումը: Մեր գործընկեր բանկերի հետ պայմանագրերն այնպիսին են, որ եթե շահառուն հաշմանդամություն ունի, թոշակառու է, հեռավոր վայրում է ապրում, ապա բանկն ինքն է տանում գումարն ամեն ամիս հասցնում: Բանկը չի պարտավորեցնում, որ շահառուն գա հասնի բանկի մասնաճյուղ: Դրա համար էլ մենք ընտրել ենք այնպիսի բանկեր, որոնք ունեն մասնաճյուղային լայն ցանց: Ես ձեզ վստահեցնում եմ՝ բոլորն, անկախ իրենց բնակավայրից, հիմնադրամի գումարները կստանան»։
Որոշումը քվեարկության արդյունքում ընդունվեց։