Վերաքննիչ դատարանը սկսել է քննել Ռոբերտ Քոչարյանի խափանման միջոցը փոխելու մասին պաշտպանների միջնորդությունը: Այսօր շուրջ 9 ժամ տեւած նիստը հետաձգվել է մինչեւ վաղը: Փաստաբաններից Արամ Օրբելյանը դրական ակնկալիքներ ունի: Ասում է՝ բողոքը մերժելու հիմքեր չի տեսնում: Հայկ Ալումյանն էլ նիստից հետո լրագրողներին տեղեկացրել է, որ երկրորդ նախագահը դատարանում խոսել է:
Մինչ այս, գլխավոր դատախազությանը Ռոբերտ Քոչարյանի խափանման միջոցը փոխելու երաշխավորագիր էին ներկայացրել Ազգային ժողովի 45 պատգամավորներ: Այն, սակայն, նախօրեին մերժվել է: Հիշեցնենք, որ Հայաստանի երկրորդ նախագահին Մարտի 1-ի գործով երկրում սահմանադրական կարգը տապալելու մեղադրանք է առաջադրվել: Հատուկ քննչական ծառայությունը կարծում է, որ ազատության մեջ հայտնվելով՝ Քոչարյանը կարող է ազդել գործի մասնակիցների վրա:
Մարտի 1-ի գործի շրջանակում երեկ խուզարկություն է կատարվել նախկին վարչապետ Հովիկ Աբրահամյանին պատկանող գործարանում: Ազգային անվտանգության ծառայության ղեկավարն այսօր լրագրողներին ասել է՝ օպերատիվ տվյալներ ունեին, որ թաքցված զենք կա, որը, հնարավոր է, կապ ունի Մարտի 1-ի դեպքերի հետ: Բայց սա, Արթուր Վանեցյանի խոսքով, դեռ վարկած է, եւ միայն փորձաքննության արդյունքում պարզ կլինի, արդյո՞ք խուզարկության ընթացքում հայտնաբերված զենքերն օգտագործվել են 2008 թվականի մարտյան դեպքերի ժամանակ:
Հատուկ քննչական ծառայության պետը հրաժարվել է հայտնել՝ Հովիկ Աբրահամյանը հարցաքննվել է, թե՞ ոչ: Հավաստել է միայն, որ նախկին վարչապետին մեղադրանք չի առաջադրվել: Սասուն Խաչատրյանը չի շտապում նաեւ ասել, որ մարտի 1-ին եւ 2-ին ցուցարարների վրա հարձակվողների թվում եղել են նաեւ Հովիկ Աբրահամյանի կողմնակիցները:
Մարտի 1-ի գործով հարցաքննված պաշտպանության նախկին նախարար Սեյրան Օհանյանին, չնայած տարածված լուրերին, մեղադրանք չի առաջադրվել: Ինչ վերաբերում է Սերժ Սարգսյանի հնարավոր հարցաքննմանը. ՀՔԾ պետն ասում է՝ նախաքննությունն է որոշելու:
Սասուն Խաչատրյանը նաեւ պնդում է, որ նախկին փոխվարչապետ Արմեն Գեւորգյանին մեղադրանք առաջադրելու համար բավարար ապացույցներ կան: Իսկ «Վիկիլիքս»-ի հրապարակման հիման վրա, ըստ նրա, մեղադրանք չի առաջադրվել:
Ի դեպ, մամուլում տեղեկություններ կան, որ իրավապահների ուշադրության կենտրոնում է հայտնվել նաեւ ՀՀԿ-ական պատգամավոր Արմեն Աշոտյանը: Ըստ լուրերի՝ օրերս նա ԱԱԾ է հրավիրվել:
10 կազմակերպություններ պաշտպանության նախարարության համար 10 մլրդ դրամի մատակարարումները խախտումներով են իրականացնել: Ազգային անվտանգության ծառայությանը (ԱԱԾ) տվյալներն ու փաստաթղթային հիմքերը տրամադրել է վարչապետի՝ կոռուպցիայի դեմ պայքարի գծով օգնականը: ԱԱԾ քննչական վարչությունում առանձնապես խոշոր չափերի յուրացման հատկանիշներով քրեական գործ է հարուցվել: Խոսքը 2009-2017 թվականների ժամանակահատվածի եւ բանակին անհրաժեշտ տարատեսակ ապրանքների ու սպառազինության մասին է: Որոշ դեպքերում պայմանագրային ժամկետներն էականորեն խախտվել են, որոշ դեպքերում էլ մատակարարվել են պայմանագրերում նախատեսվածից իրականում ցածր արժեք ունեցող, անորակ ապրանքներ: Պետությանը պատճառված վնասի ճշգրիտ չափը հաշվարկելու համար ստուգումներ եւ փորձաքննություններ են նշանակվել:
Կես տարվա ընթացքում հայ-թուրքական սահմանի Արտաշատի հատվածում մեկ տասնյակից ավելի սահմանախախտ է ձերբակալվել: Ամփոփելով առաջին կիսամյակի տվյալները՝ Արտաշատի սահմանապահ ջոկատի պետ Յուրի Ուրվանովը նշել է, որ սահմախախտների մեծ մասն Աֆղանստանի քաղաքացիներ են եղել, մի քանիսն էլ՝ Բանգլադեշի քաղաքացիներ: Նախորդ տարվա համեմատ, 2018-ին ապօրինի սահմանահատման դեպքերն ավելացել են: Ուրվանովը ենթադրում է, որ սա կապված է տարածաշրջանային հակամարտությունների հետ: Ինչ վերաբերում է թմրանյութերի շրջանառությանը. սահմանի այս հատվածում նման դեպքեր չեն եղել:
Այնթափ գյուղից 14-ամյա Հայկ Հարությունյանի անհետանալուց երկու ամիս է անցել: Ոստիկանության, ԱԻՆ ծառայողների եւ կամավորների տեւական որոնումներն արդյունք չեն տվել: Աուտիզմ ունեցող 14-ամյա տղան տանից դուրս է եկել հունիսի 8-ին ու չի վերադարձել: Առաջին օրերին պարբերաբար տեղեկություններ էին ստացվում, որ Հայկին նկատել են տարբեր քաղաքներում, սակայն նրան գտնել այդպես էլ չհաջողվեց: Երեխայի անհետացումից տասն օր անց Արարատի մարզի դատախազությունը սպանության հոդվածով քրեական գործ է հարուցել:
Վրաստանի ափերին առաջիկա օրերին լողալն արգելվում է. օգոստոսի 9-ին ծովում 4-5 բալանոց փոթորիկ է սպասվում: Տեղական աղբյուրների համաձայն՝ ալիքների բարձրությունը կարող է հասնել 1.5-ից 3 մետրի: Սեւ ծովի ափին բոլոր փրկարարական աշտարակներում արդեն կարմիր դրոշներ են տեղադրված: Փրկարարները հանգստացողներին կոչ են արել չանտեսել արգելող նշանները, ինչպես նաեւ հետեւել անվտանգության կանոններին:
Օգոստոսի 9-ին դոլարն ու եվրոն շարունակել են ամրապնդել դիրքերը: Դոլարի փոխարժեքը կազմել է 481 դրամ, եվրոյինը՝ 558, ռուբլունը՝ 7 դրամ 32 լումա, ֆունտինը՝ 621 դրամ:
Օգոստոսի 10-11-ին հանրապետության շրջանների զգալի մասում սպասվում է անձրեւ եւ ամպրոպ, առանձին հատվածներում հնարավոր է կարկուտ: Օդի ջերմաստիճանը 4-5 աստիճանով կնվազի: Երեւանում նույնպես վաղը տեղումներ են սպասվում: Մայրաքաղաքում գիշերը կդիտվի +18+20, ցերեկը՝ +30+32 աստիճան տաքություն: