News
Լրահոս
News
Երեքշաբթի
Հոկտեմբեր 23
Տեսնել լրահոսը

Հայաստանյայց Առաքելական Ս. Եկեղեցին այսօր՝ օգոստոսի 12-ին մեծ շուքով նշել է Ս. Աստվածածնի Վերափոխման տոնը: Այդ առիթով Էջմիածնի մայր տաճարում մատուցվել է Սուրբ Պատարագ. պատարագիչը Մայր Աթոռ Սուրբ Էջմիածնի Դիվանապետ Գերաշնորհ Տ. Արշակ եպիսկոպոս Խաչատրյանն էր: Այս մասին տեղեկանում ենք Մայր Աթոռ Ս. Էջմիածնի տեղեկատվական համակարգից:

Սրբազան Հայրը, իր քարոզում անդրադառնալով տոնի խորհրդին եւ Սուրբ Աստվածածնի կերպարին, մեջբերել է Ղուկաս Ավետարանչի կողմից հիշատակված ու Մարիամ Աստվածածնի կողմից արտաբերված խոսքերը. «Ահավասի՛կ, ես մնում եմ Տիրոջ աղախինը, թող քո խոսքի համաձայն լինի ինձ» (Ղուկ. 1:38), եւ խոսել այն բացառիկ խոնարհության եւ հնազանդության մասին, որը դրսեւորել էր Սուրբ Կույսը Տիրոջ հանդեպ:

«Մեր հավատքի հայրը՝ Գրիգոր Լուսավորիչը, հնազանդվեց Աստծուն՝ քրիստոնեության լույսը Հայոց աշխարհում տարածելու համար: Սուրբ Տրդատը հնազանդվեց Աստծուն, որպեսզի դառնա հովանավորը քրիստոնեությունը Հայաստանում տարածման, Ավարայարի և Սարդարապատի քաջերը հնազանդվեցին Աստծուն և զոհաբերեցին իրենց կյանքը՝ ի սեր քրիստոնեության և ի սեր հայրենիքի: Այդպիսի հնազանդություն էր նաև արցախյան ազատամարտի տարիներին մեր քաջամարտիկների զոհողությունը, այդպիսի հնազանդություն է նաև այսօր մեր ժողովրդի կողմից դրսևորված հավատարմությունն Աստծուն: Երբ մենք ասում ենք, որ հավատարիմ ենք Աստված քեզ, հնազանդ ենք քեզ, մենք ոչ ենք ասում բոլոր այն օտարամուտ բարքերին ու սովորույթներին, այլասերված նորամուծություններին, որոնք բացարձակապես չեն տեղավորվում մեր հավատքի շրջանակներում և մեր հոգևոր, կրոնական պատկերացումների մեջ: Եվ այսօր Աստվածածինն օգնության է եկել մեզ՝ իր հնազանդությամբ նորոգելու մեր հավատարմությունը, նորոգելու մեր ուխտը, որպեսզի շարունակենք հնազանդ լինել Աստծուն, բայց նաև երբևէ հանդուրժողականություն չդրսևորենք այն արատների, այն մեղքերի, այն շեղումների նկատմամբ, որոնք կարող են տեղ գրավել մեր ազգային-եկեղեցական կյանքում»,- ասել է Արշակ Սրբազանը:

Հավարտ Ս. Պատարագի, հանդիսապետությամբ Գերաշնորհ Տ. Նաթան արքեպիսկոպոս Հովհաննիսյանի, Ս. Տրդատի բաց խորանի վրա կատարվել է Խաղողօրհնեքի արարողությունը:

Վերջում օրհնված խաղողի ողկույզները բաժանվել են հավատավոր ժողովրդին:

Տպել
Partner news