Սաուդյան Արաբիայի պետական ներդրումային ֆոնդը ցանկանում է Tesla ընկերությունում լուրջ ներդրումներ կատարել: Սաուդցիներն արդեն բանակցություններ են վարում ընկերության ներկայացուցիչների հետ, հայտնում է Bloomberg-ը՝ վկայակոչելով սաուդյան ֆոնդում աղբյուրներին:
Նշված ֆոնդն արդեն մի քանի ամիս ընկերության հիմնադիր Իլոն Մասկի հետ քննարկել է բաժնետոմսերի ոչ վերահսկողական փաթեթի ձեռքբերման հարցը, սակայն մերժում էր ստացել, քանի որ ընկերությունը չէր ծրագրել այդ ժամանակ նոր բաժնետոմսեր թողարկել, հայտնել է քննարկումներին ծանոթ աղբյուրը: Ֆոնդն, իր հերթին, ներդրումային բանկի միջոցով շուկայում գնել է Tesla-ի գրեթե 2 մլրդ դոլարի բաժնետոմսեր՝ ընկերությունում բաժինը մեծացնելով մինչեւ 5 տոկոսի:
Աղբյուրները Bloomberg-ին հայտնել են, որ ֆոնդը Tesla-ին դեռեւս ոչ մի կոնկրետ առաջարկ չի արել, սակայն բանակցությունները շարունակվում են, եւ ընկերությունում ներդրումները համարվում են նավթից Սաուդյան Արաբիայի տնտեսության դիվերսիֆիկացման ռազմավարական քայլ: