«Լիդիան Արմենիա» ընկերության աշխատակիցներն այսօր՝ օգոստոսի 13-ին, բողոքի ակցիա են անցկացնում Կառավարության դիմաց՝ կոչ անելով միջամտել՝ վերջ տալ Ամուլսարի ճանապարհների ապօրինի շրջափակմանը և ապահովել արժանապատիվ աշխատելու մեր սահմանադրական իրավունքի վերականգնումը:
Բնակիչները կոչով նաեւ դիմում են Հայաստանի բոլոր իրավապաշտպան կազմակերպություններին՝ իրենց կոպտորեն խախտվող իրավունքները պաշտպանելու կոչով։
«Մի քանի տասնյակ անձինք՝ հանդես գալով համայնքի անունից, արդեն 50 օր ապօրինաբար զրկել են մեզ աշխատելու իրավունքից։ Այս արարքը ապօրինություն է և պատկան մարմինները պետք է քայլեր ձեռնարկեն մեր իրավունքները պաշտպանելու ուղղությամբ։ Արդյոք Ամուլսարը համապատասխանում է բնապահպանական նորմերին, պետք է որոշեն համապատասխան կառույցները, և ոչ թե մի խումբ՝ անհայտ աղբյուրներից սնվող օրինազանց մարդիկ։ Մինչդեռ պետությունը այսօր քայլեր չի ձեռնարկում հանքի շինարարության ապօրինի կասեցումը դադարեցնելու և մեր՝ օրինապաշտ քաղաքացիներիս իրավունքները պաշտպանելու և ապօրինություն իրականացնող ինքնակոչ «բնապահպաններից» պաշտպանելու համար։ Մենք ենք համայնքը և մենք ենք իրականում Հայաստանի հպարտ քաղաքացիները: Մեր իրավունքները կոպտորեն խախտվում են»,- ասում են ցուցարարները:
Նրանք Կառավարության դիմաց պահանջում են հանդիպում վարչապետ Նիկոլ Փաշինյանի հետ:
