Անհատ տաքսու վարորդների մեծամասնությունը հակված է Երեւանի ավագանու արտահերթ ընտրություններին քվեարկել Հայկ Մարությանի օգտին։ Այս մասին այսօր՝ օգոստոսի 13-ին, լրագրողների հետ հանդիպմանն ասաց Անհատ տաքսու վարորդների անկախ արհեստակցական կազմակերպության նախագահ Սերգեյ Գյոզալյանը՝ ներկայացնելով իրենց կողմից իրականացված հարցման արդյունքները։
«Հարցումը ձեւակերպված է եղել հետեւյալ կերպ՝ ում կցանկանայիք տեսնել Երեւանի քաղաքապետի պաշտոնում։ Այն իրականացվել է 500 վարորդի շրջանակներում, որը վարորդների 2 տոկոսն է կազմում»,– նշեց Գյոզալյանը։
Նրա խոսքով՝ Հայկ Մարությանին քաղաքապետ է տեսնում հարցվածների 43 տոկոսը, երկրորդ տեղում Արտակ Զեյնալյանն է՝ 19 տոկոս, ապա Արարատ Զուրաբյանը՝ 5 տոկոս, Զարուհի Փոստանջյանը՝ մոտ 5 տոկոս, Նաիրա Զոհրաբյանը՝ 3 տոկոս, իսկ հարցվածների 25 տոկոսը չէր պատրաստվում քվեարկել կամ դեռեւս չէին կողմնորոշվել։ Հարցումը մեկնարկել է երկու շաբաթ առաջ։
«Ընդ որում, նրանք, որոնք սատարում էին Հայկ Մարությանի թեկնածությունը, հարցման ժամանակ նշում էին, որ կքվեարկեն «Նիկոլի թեկնածուի» օգտին։ Փաստացի Հայկ Մարությանի վարկանիշը Նիկոլ Փաշինյանի վարկանիշն է իրականում»,– եզրափակեց նա։
Անհատ տաքսու վարորդների անկախ արհեստակցական կազմակերպության նախագահը նաեւ նշեց, որ կցանկանային հանդիպել Հայկ Մարությանի հետ՝ հասկանալու համար ինչպես է պատրաստվում վերջինս լուծումներ տալ տաքսու վարորդներին անհանգստացնող խնդիրներին։