Միջոցներ են ձեռնարկվում՝ պարզելու Երեւանի Արտաշատի խճուղում գտնվող առանձնատներից մեկից կատարված գողության հանգամանքները:
Քննչական կոմիտեից հայտնում են, որ հուլիսի 18-ին հաղորդում է ստացվել, որ նույն օրը ժամը 10:40-ի սահմաններում ենթադրյալ հանցագործություն կատարած անձը՝ մեկ այլ անձի օժանդակությամբ, բաց պատուհանից մուտք է գործել քաղաքացու՝ Երեւանի Արտաշատի խճուղում գտնվող առանձնատուն եւ հափշտակել վերջինիս պայուսակը, որի մեջ եղել է կանխիկ գումար, փաստաթղթեր եւ այլ իրեր:
Դեպքի առթիվ հարուցվել է քրեական գործ Քրեական օրենսգրքի 176-րդ հոդվածի 3-րդ մասի 1.1 կետով, 38-176-րդ հոդվածի 3-րդ մասի 1.1 կետով եւ 324-րդ հոդվածի 1-ին մասով:
Նախաքննության ընթացքում ստացվել են առանձնատան տեսախցիկների՝ տվյալ օրվա տեսագրությունները, ենթարկվել զննության:
Քրեական գործով բազմակողմանի, օբյեկտիվ եւ լրիվ քննությունն ապահովելու նպատակով միջոցներ են ձեռնարկվում՝ տեսանյութում պատկերված երիտասարդներին հայտնաբերելու ուղղությամբ։
Խնդրում ենք նշված անձանց ներկայանալ վարույթն իրականացնող մարմնին կամ ովքեր ճանաչում են նրանց, որեւէ տեղեկություն ունեն նրանց ինքնության կամ գտնվելու վայրի մասին, հայտնեն ՀՀ քննչական կոմիտեի Երեւան քաղաքի քննչական վարչության Շենգավիթ վարչական շրջանի քննչական բաժին: