Ամերիկյան վարչակազմը օտարերկրյա ահաբեկիչների ցուցակում ներառել է Իրանի քաղաքացի Քասիմ Աբդուլա Ալի Ահմեդին՝ նրան մեղադրելով Բահրեյնում քայքայիչ գործողությունները համակարգելու մեջ, հաղորդում է ՏԱՍՍ-ը:
Երկուշաբթի ԱՄՆ Պետդեպարտամենտի մամուլի ծառայությունը հաղորդել է, որ ԱՄՆ իշխանությունները այս իրանցուն, որը հայտնի է նաեւ որպես Քասիմ Ալ-Մուամեն, համարում են «Ալ-Վաֆա» արմատական իսլամական կուսակցության, որը «ձգտում է տապալել Բահրեյնի կառավարությունը», զինված թեւի՝ «Բրիգադ Ալ-Աշտար»-ի առաջնորդ:
ԱՄՆ իշխանությունների խոսքով, Իրանի քաղաքացին Բահրեյնում զբաղվել է ահաբեկիչների հավաքագրմամբ, աջակցել է «Բրիգադ Ալ-Աշտարի» զինյալների պատրաստվածությանը, այդ թվում, սովորեցրել է նրանց պայթուցիկների հետ վարվելու հմտություններ, զինել է այդ մարդկանց եւ ապահովել նրանց ֆինանսավորումը:
