Երկրորդ նախագահ Ռոբերտ Քոչարյանի ասուլիսը չի կայանա, որովհետեւ, ինչպես տեսնում եք, իշխանական ակտիվիստներն ուզում են որ Ռոբերտ Քոչարյանն իր տեսակետները չհայտնի։ Այդ մասին NEWS.am-ին ասաց երկրորդ նախագահի գրասենյակի ղեկավար Վիկտոր Սողոմոնյանը։
«Տեղի ունեցածն ապացուցում է այն, ինչի մասին ես օրեր շարունակ խոսում էի։ Քիչ անց մենք հայտարարությամբ հանդես կգանք»,– ասաց Սողոմոնյանը։
Հիշեցնենք, որ այսօր՝ ժամը 12։00–ին պետք է տեղի ունենար երկրորդ նախագահ Ռոբերտ Քոչարյանի մամուլի ասուլիսը, սակայն այն տապալվեց ակտիվիստների նախաձեռնությամբ, ովքեր ներխուժեցին ասուլիսի սրահ։ Ասուլիսը տապալելուց հետո, ակտիվիստները բողոքի ակցիան շարունակեցին Գլխավոր դատախազության մոտ, ինչից հետո շարվեցին դեպի Արդարադատության նախարարության շենք։
Հիշեցնենք, որ Վերաքննիչ դատարանը երեկ՝ օգոստոսրի 13-ին, բավարարել է երկրորդ նախագահի պաշտպանների միջնորդությունը եւ հենց դատարանի դահլիճից ազատ արձակել նրան՝ հաշվի առնելով, որ նա անձեռնմխելի է: Հատուկ քննչական ծառայությունն ավելի ուշ հայտարարել է, որ Քոչարյանին ազատ արձակելու՝ Վերաքննիչ դատարանի որոշումն ապօրինի է, եւ հույս հայտնել, որ գլխավոր դատախազությունը Վճռաբեկ բողոք կներկայացնի:
Ավելի վաղ NEWS.am-ը հայտնել էր, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քրգործով ՀՀ երկրորդ նախագահ Ռոբերտ Քոչարյանին, ՀՀ պաշտպանության նախկին նախարար Միքայել Հարությունյանին եւ ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նրանք այլ անձանց հետ նախնական համաձայնությամբ տապալել են Հայաստանի Հանրապետության սահմանադրական կարգը:
Միքայել Հարությունյանի նկատմամբ հետախուզում է հայտարարվել, Յուրի Խաչատուրովը 5 մլն գրավի դիմաց ազատ է արձակվել:
