Երեւանում ընթացող «Պրիվետ, Ռոբ» բողոքի ակցիայի մասնակիցները քայլեցին դեպի Բարձրագույն դատական խորհրդի գրասենյակ՝ դատավոր Ալեքսանդր Ազարյանի լիազորությունների դադարեցումը պահանջելու համար:
Հիշեցնենք, որ նախօրեին Վերաքննիչ դատարանը՝ ի դեմս դատավոր Ազարյանի, ազատ արձակեց Հայաստանի Հանրապետության երկրորդ նախագահ Ռոբերտ Քոչարյանին՝ որոշումը հիմնավորելով նախկին նախագահի անձեռնմխելիությամբ: Այսօր կեսօրին նախատեսված էր Ռոբերտ Քոչարյանի մամուլի ասուլիսը, սակայն վերոհիշյալ ակցիայի մասնակիցները ներխուժեցին դահլիճ, եւ արդյունքում մամուլի ասուլիսը չեղյալ հայտարարվեց: Այնուհետեւ ցուցարարները գնացին Գլխավոր դատախազություն՝ պահանջելով անմիջապես վճռաբեկ բողոք ներկայացնել: Դրանից հետո ակտիվիստները որոշեցին պահանջել դատավոր Ալեքսանդր Ազարյանի լիազորությունների դադարեցումը:
Նշենք, որ երեկ Հատուկ քննչական ծառայությունը վերաքննիչ դատարանի գործողությունները գնահատել է որպես «ապօրինի»:
