ՀՀ Վերաքննիչ դատարանի՝ ՀՀ երկրորդ նախագահ Ռոբերտ Քոչարյանի ազատ արձակման որոշման շուրջ ՀՔԾ հայտարարությունը մարդկանց զգացմունքների հետ խաղալու եւ մանիպուլյացիայի միջոց է: Այս մասին այսօր՝ օգոստոսի 16-ին, լրագրողների հետ հանդիպմանը հայտարարեց Ռոբերտ Քոչարյանի փաստաբան Հայկ Ալումյանը։
«Ժողովուրդը հայտնվել է դատավորի կարգավիճակում, սակայն լավ դատավորը լսում է 2 կողմերին էլ: ՀՔԾ-ն խոսում է ամբողջ ժողովրդի եւ պետության անունից, սակայն չի կարելի ՀՀ անունից դատական ակտը համարել ապօրինի։ Նման հայտարարարությունները իրենք իրենցով ապօրինի են: Առավելագույնը պետք է ասեին, որ համամիտ չեն, ցանկանում են բողոքարկել»,–նշեց փաստաբանը՝ կարծիք հայտնելով, որ այդպես ՀՔԾ–ն ցանկանում է հաճոյանալ իշխանություններին:
Ալումյանի համոզմամբ՝ սա մարդկանց զգացմունքների հետ խաղալու եւ մանիպուլյացիայի միջոց է. «Սա բիրտ ճնշում է նաեւ դատավորի նկատմամբ, ընդ որում՝ խոսքը քրեական գործերով ազնվագույն դատավորի մասին է, չի կարելի նման բան անել, սա անթույլատրելի է»:
Հիշեցնենք, որ Վերաքննիչ դատարանն օգոստոսի 13-ին վերացրել էր Ռոբերտ Քոչարյանի խափանման միջոց կալանքն ու նրան նիստերի դահլիճից ազատ արձակել՝ հաշվի առնելով, որ նա անձեռնմխելի է:
Այնուհետեւ Ռոբերտ Քոչարյանի կողմից հրավիրված մամուլի ասուլիսը տապալվեց մի խումբ ցուցարարների կողմից: