ՀՀ երկրորդ նախագահ, երկրի սահմանադրական կարգը տապալելու մեջ մեղադրվող Ռոբերտ Քոչարյանին կալանքից ազատելու՝ ՀՀ Վերաքննիչ քրեական դատարանի որոշումն անհիմն է: Այս մասին այսօր՝ օգոստոսի 16-ին, ասուլիսի ժամանակ ասաց նախկին դատավոր Պարգև Օհանյանը:
Նրա կարծիքով՝ ՀՀ վճռաբեկ դատարանը պետք է բեկանի այդ որոշումը և ուժի մեջ թողնի առաջին ատյանի դատարանի որոշումը:
Նախկին դատավորի կարծիքով՝ Ռոբերտ Քոչարյանի գործով հիմնավոր չէ խոսել անձեռնմխելիությունից:
«Չի կարող անձը լինել անպատժելի, ով ուզում է՝ լինի: Չէ՞ որ օրենքի առաջ բոլորը հավասար են: Այս պարագայում խոսել անձեռնմխելիությունից, իհարկե, հիմնավոր չէ: 1995-ի, նաև 2005-ի Սահմանադրության մեջ կար, բայց չկա գործող Սահմանադրության մեջ, որ ՀՀ նախագահը կարգադրություններ և հրամանագրեր է հրապարակում, որոնք պետք է չհակասեն Սահմանադրությանը: Սա էլ է խոսում այն մասին, որ Ռոբերտ Քոչարյանի գործողությունները, որից հիմա կառչում են, չեն բխել իր կարգավիճակից: Կարգավիճակից կբխեին, եթե բխեին օրենքից՝ կարգավիճակով իրեն վերապահված լիազորություններից»,- ասաց նա:
Նախկին դատավորը նշեց, որ բանակը չէր կարող գործել առանց ռազմական դրություն հայտարարելու, դրա հիմքերը, սակայն, չեն եղել:
«Ուստի ակնհայտ է, որ նախագահի գործողությունները չեն բխել Սահմանադրությամբ իրեն տրված լիազորություններից և, հետևաբար, իր կարգավիճակից»,- ասաց Պարգեւ Օհանյանը:
Դատավորը նկատեց, որ այս գործով քննիչները շատ են շտապում, նրանք սկզբում անձին կալանավորում են, հետո սկսում են քննություն անցկացնել:
«Նրանք նախ պետք է բավարար հիմքեր ձեռք բերեն, կատարեն բոլոր գործողությունները, հետո միայն լուծեն անձի խափանման միջոցի հարցը: Ամեն դեպքում՝ դիմացինը մարդ է, և ամենաբարձրն են դասվում մարդու իրավունքները»,- հավելեց նախկին դատավորը: