Էներգետիկ ենթակառուցվածքների եւ բնական պաշարների նախարար Արթուր Գրիգորյանն այսօր՝ օգոստոսի 17-ին, ընդունել է Հայաստանի Հանրապետությունում Չինաստանի Ժողովրդական Հանրապետության արտակարգ եւ լիազոր դեսպան Թիան Էրլունին։
Նախարարության տեղեկատվության եւ հասարակայնության հետ կապերի բաժնից հայտնում են, որ քննարկվել է էներգետիկայի եւ ենթակառուցվածքների բնագավառներում հայ-չինական համագործակցությանը վերաբերող հարցերի լայն շրջանակ:
Նախարարը դեսպանին է ներկայացրել էներգետիկայի բնագավառի զարգացման առաջնահերթություններն ու համատեղ ծրագրերի իրականացման հնարավորությունները։
Զրուցակիցները մտքեր են փոխանակել նախարար Գրիգորյանի՝ Չինաստան կատարած այցի շրջանակում ձեռքբերված պայմանավորավածությունների վերաբերյալ: Այդ համատեքստում անդրադարձ է եղել «Hanergy» խոշորագույն ընկերության կողմից արեւային լուսաթաղանթների արտադրություն հիմնելու նախագծին, ինչպես նաեւ «CITIC» չինական ընկերության կողմից Հայաստանում պղնձաձուլարանի կառուցման ծրագրին:
Կողմերը վերահաստատել են իրենց պատրաստակամությունը երկու երկրների միջեւ համատեղ ծրագրերի իրականացման գործընթացում ջանքերը մեկտեղելու համար: