Այս քաղաքական իրավիճակի չհասկացվածության պատճառն է, որ դեռեւս ոմանք Հայաստանի ներքաղաքական կյանքում խոսելիս ասում են կոալիցիա, կոալիցիոն իշխանություն, խորհրդարանական մեծամասնություն հասկացությունները։ Հայաստանում չկա կոալիցիա, ՀՀ-ում չկա կոալիցիոն իշխանություն, ՀՀ-ում չկա խորհրդարանական մեծամասնություն, ՀՀ-ում կա ժողովուրդ։ Այս մասին այսօր՝ օգոստոսի 17-ին պաշտոնավարման 100 օրն ամփոփող հանրահավաքի ժամանակ ասաց ՀՀ վարչապետ Նիկոլ Փաշինյանը։
«ՀՀ-ում բարձրագույն իշխանությունը պատկանում է ուղիղ ժողովրդին, եւ ժողովուրդն իրականացնում է ուղիղ կառավարում, հենց սրանում է Հայաստանում տեղի ունեցած հեղափոխության առանցքային իմաստը։
Գործնականում դա նշանակում է, որ հեղափոխական այս հրապարակը հռչակվում է որպես ժողովրդական իշխանության բարձրագույն մարմին։ Սա նշանակում է, որ կառավարությունը, ինչպես ձեւավորվել է այս հրապարակում, կառավարությունը հաշվետու է այս հրապարակին եւ այսուհետ կառավարությունը ենթարկվում է այս հրապարակին։ Սա նշանակում է, որ մենք երկրի քաղաքական, տնտեսական կյանքի կարեւորագույն որոշումները կայացնելիս պետք է ժողովրդով հավաքվենք այս հրապարակում եւ կառավարությանը լիազորենք այս կամ այն գործողությունն անել կամ արգելենք։ Դուք եք Հայաստանում բարձրագույն եւ միակ իշխանությունը։ ՀՀ-ում իշխանությունը պատկանում է ձեզ։
Այն իրադարձությունը, որ տեղի է ունեցել այս հրապարակում, պատմագիտական առումով կարող է հետագայում հիշատակվել նույն մակարդակի վրա, ինչպես հին Աթենքում՝ ժողովրդավարության հաստատումը: ՀՀ-ը պատմական հեռանկարում կարող է հիշատակվել այնպես, ինչպես հիմա հիշատակվում է Հին Հունաստանը, Երեւանը կարող է հիշատակվել՝ ինչպես հին Աթենքը եւ Հանրապետության հրապարակը կարող է դառնալ 21-րդ դարի մարդկության նորագույն ժամանակների Ագորան, որտեղ ստեղծվել է ժամանակակից քաղաքակրթությունը: Եվ այդ իրադարձությունը դուք եք ստեղծել»,- հավելեց վարչապետը: