Հայաստանի նախորդ նախագահների օրոք եղել են մարդու իրավունքների զանգվածային ոտնահարումներ, եւ հիմա դրանք ուղղելու փորձեր են նախաձեռնվում: Այս մասին NEWS.am-ի թղթակցի հետ զրույցում ասաց «Ընդդեմ իրավական կամայականության» հասարակական կազմակերպության գործադիր տնօրեն, Հայաստանի առաջին օմբուդսմեն Լարիսա Ալավերդյանը՝ մեկնաբանելով վարչապետ Նիկոլ Փաշինյանի եւ նրա թիմի կառավարման 100 օրվա արդյունքները:
Ընդ որում՝ Ալավերդյանը նշեց, որ իր խոսքն ինչպես էլ ընկալվի, ինքը մշտապես կպնդի, որ այս ոլորտում պետք է նուրբ աշխատել:
«Շատ մարդկանց իրավունքները վերականգնելու փորձ, ավելի ճիշտ ցանկություն կա: Սակայն հընթացս չպետք է խախտվեն առանձին մարդկանց իրավունքները, գուցե եւ օդիոզ դեմքերի: Ահա թե որն է հարցը»,- պարզաբանեց առաջին օմբուդսմենը՝ հավելելով, սակայն, որ այս նպատակներին անհրաժեշտ է հասնել իրավական ու իրավաբանական տեսակետից կոռեկտ եւ անթերի քայլերով:
Միաժամանակ, Ալավերդյանը նշեց, որ իրեն հասկանալի չէ այն շտապողականությունը, որը դրսեւերվեց երկրորդ նախագահ Ռոբերտ Քոչարյանին կալանավորելիս: Իրավապաշտպանը շեշտեց, որ դատական համակարգը սկզբունքորեն առավել իներցիոններից մեկն է, քանի որ այն մեկ ժամում չի փոխվում:
«Համակարգում մարդիկ են աշխատում: Անհնար է նրանց բոլորին միանգամից փոխել: Իսկ եթե անգամ փոխեն, ապա ումո՞վ… Ինձ թվում է պետք է նախաձեռնել ինչ-որ ինստիտուցիոնալ քայլեր: Որովհետեւ, իմ կարծիքով, բավարար չէ հույսը դնել ուղղակի կոչերի եւ բացահայտումների վրա: Համակարգը խորը մշակման եւ բարեփոխումների կարիք ունի, ինչպես նաեւ իմիտացիոն կարգախոսներից ու մոտեցումներից իրականության անցման»,- կարծում է իրավապաշտպանը:
Ալավերդյանի կարծիքով՝ այս հարցը չափազանց բարդ է եւ պահանջում է համբերությամբ զինվել: