News
Լրահոս
News
Շաբաթ
Փետրվար 23
Տեսնել լրահոսը


Դիլիջանում օգոստոսի 17-ին բացվել է Տավուշում առաջին Զբոսաշրջային տեղեկատվական կենտրոնը: Բացմանը ելույթով հանդես եկան Հայաստանում ԵՄ պատվիրակության համագործակցության բաժնի ղեկավար Հոա-Բին Աջեմյանը, IDeA հիմնադրամի տնօրեն Րաֆֆի Պաղճեանը և Դիլիջան համայնքապետարանի ներկայացուցիչը:

Կենտրոնը կառուցվել է «Դիլիջանի և հարակից համայնքների զարգացման նախաձեռնություն» ծրագրի շրջանակում, որը «Հայաստանի զարգացման նախաձեռնություններ» (IDeA) հիմնադրամն իրականացնում է Եվրոպական միության, Հայաստանի Տարածքային կառավարման և զարկացման նախարարության համաֆինանսավորմամբ` համագործակցելով Դիլիջանի համայնքապետարանի և Դիլիջանի ազգային պարկի հետ:

Զբոսաշրջային տեղեկատվական կենտրոնը կտրամադրի անվճար տեղեկատվություն Դիլիջան և տարածաշրջան այցելող զբոսաշրջիկներին: Կենտրոնին հարակից նաև բարեկարգվել է Դիլիջանի քաղաքային այգին IDeA հիմնադրամի ֆինանսավորմամբ: Առաջին փուլում կատարվել է այգու էտում, ցանկապատերի վերանորոգում, նստարանների, աղբամանների փոխարինում նորով: Լինելու է նաև ծրագրի երկրորդ` առավել լայնածավալ փուլը, որով նախատեսվում է նոր ատրակցիոնների և ժամանցի ատրիբուտների կառուցում:

«Եվրոպական միությունն աջակցում է կառավարությանը Հայաստանի մարզերի միջև հավասար սոցիալական և տնտեսական զարգացում ապահովելու համար` նոր աշխատատեղերի ստեղծման և մարզերի տնտեսական մրցակցության խթանման միջոցով» - ասել է Հայաստանում ԵՄ պատվիրակության համագործակցության բաժնի ղեկավար Հոա-Բին Աջեմյանը:

«IDeA հիմնադրամը շարունակական և մեծածավալ նախագծեր է իրականացնում Դիլիջանում, որոնց նպատակն է այս տարածաշրջանը դարձնել մշակութային, կրթական, առողջապահական և զբոսաշրջային առաջատար կենտրոն» - ասել է IDeA հիմնադրամի տնօրեն Րաֆֆի Պաղճեանը:

Ըստ նրա` կենտրոնի բացումը և զբոսայգու բարեկարգումը կստեղծեն անհրաժեշտ ենթակառուցվածքներ, որպեսզի Դիլիջանը դառնա Կովկասյան Դավոս, ուր աշխարհի տարբեր երկրների զբոսաշրջիկների կառաջարկվեն բարձրակարգ ծառայություններ:

Դիլիջանի Զբոսաշրջային կենտրոնում աշխատանքի տեղավորված 6 բնակիչները ծրագրի ուղղակի շահառուներ են: Կատարվել են նաև Դիլիջանի ազգային պարկի 5 արահետների վերանորոգման աշխատանքներ, որոնցից 4-ը` քայլաշավային է, 1-ը`հեծանվային:

!
Այս նյութը հասանելի է նաև   English, Русский and Türkçe
Տպել
Կարդացեք նաև
Ամբողջը