News
Լրահոս
News
Չորեքշաբթի
Սեպտեմբեր 19
Տեսնել լրահոսը

«Ծառուկյան» դաշինք խմբակցության պատգամավոր, ՀՀՇ կուսակցության անդամ Արարատ Զուրաբյանը NEWS.am-ի հետ զրույցում անդրադարձավ վարչապետ Նիկոլ Փաշինյանի հրավիրած հանրահավաքում հնչեցրած մի քանի առանցքային մտքերի:

Հանրահավաքի ժամանակ վարչապետ Նիկոլ Փաշինյանը հնչեցրեց հետեւյալ միտքը, որ Հայաստանում այլեւս գոյություն չունի խորհրդարանական մեծամասնություն, չկա կոալիցիա, չկա կոալիցիոն իշխանություն, կա միայն ժողովրդի իշխանություն: ՀՅԴ-ն եւ ԲՀԿ-ն ներկայիս կառավարության կոալիցիոն գործընկերներն են եւ աջակցել են Նիկոլ Փաշինյանին 3 ամիս առաջ: Ձեզ համար այս հայտարարությունն ընդունելի է, թե՞ տարակուսանք առաջացնող:

Ես հստակ կասեմ մեկ բան, հանրահավաքի ժանրը պահանջում է հանրահավաքի ելույթ: Համաձայնության կառավարությունը սահմանադրական կարգի վերականգնման եւ թավշյա հեղափոխության արդյունքն է: Կարծում եմ՝ պետք չէ նեղվել հանրահավաքային ոճաբանությունից, որը պահանջված է այսօր: Ակնհայտ է մի բան. միեւնույն է անկախ ամեն ինչից ՀՀ-ում գործում են իշխանության ինստիտուտները, լավ են գործում, թե վատ դրա վերաբերյալ յուրաքանչյուրն ունի իր կարծիքը: Իմ գնահատմամբ, որ լավ չեն գործում, վատ են գործում եւ փոփոխություններ են անհրաժեշտ բոլոր ոլորտներում եւ բնագավառներում, սակայն որեւէ մեկը չի դադարեցնում Հայաստանի Սահմանադրության գործունեությունը: Բոլորս առաջնորդվելու ենք ՀՀ Սահմանադրությամբ եւ օրենքներով, ինչը եւ անում է Նիկոլ Փաշինյանը: Չմոռանանք, որ Սահմանադրությունը երկրորդ կետով հայտարարում է, որ ՀՀ-ում իշխանությունը պատկանում է ժողովրդին, այն սոցիալական, ժողովրդավարական եւ այլ պետություն է: Այսինքն՝ մենք պետք է նկատի ունենանք, որ Սահմանադրությունը ժողովրդին  միշտ էլ տալիս է կառավարելու հնարավորություն, բայց կառավարման հնարավորությունը իրագործում է համապատասխան գործիքակազմով, որի մեջ է մտնում ԱԺ-ն, դատական համակարգը եւ այլն:

Վարչապետ Նիկոլ Փաշինյանը հնչեցրեց մի միտք, որ դատական համակարգի որոշ մասը դեռ շարունակում է ծառայել նախորդ իշխանություններին,  եւ խոսեց անցումային արդարադատության մարմիններ ստեղծելու մասին: Կոնգոյում եւ Բուրունդիում, որտեղ տեղի է ունեցել ցեղասպանություն, ստեղծվեցին  անցումային արդարադատության մարմիններ, որոնք ավելի վատթարացրին իրավիճակը: Արդյո՞ք ՀՀ-ում անցումային արդարադատության մարմինների անհրաժեշտություն:

Ես էլի եմ կարծում, որ այստեղ գործում է հանրահավաքային հռետորաբանությունը, որը շատ բնական է: Բայց այս արտահայտությունների մեջ ես տեսնում եմ կոչ դատական համակարգերի  ներկայացուցիչներին, հենց Փաշինյանի հնչեցրած կոչը, եղեք իրոք ազնիվ, առաջնորդվեք ՀՀ օրենքներով եւ ձեր դատական ակտերը կայացրեք համաձայն օրենքի, ոչ  թե ճնշման:  Ակնհայտ է, որ այդ դատական համակարգը ստեղծվել եւ կայացել է նախորդ իշխանությունների կողմից: Այս վերջին 20 տարիների ընթացքում մարդիկ ձեւավորել են դատական համակարգ, որտեղ ՀՀ քաղաքացին մշտապես առճակատվել է անարդարության, սխալ կայացված դատական վճիռների  եւ նման տիպի բացասական երեւույթների հետ: Կարծում եմ, որ սա Փաշինյանի կոչն էր փոխել գործելակերպը  եւ ինչ-որ մի տեղ փորձել կրթելու դատական համակարգը, ասենք ճիշտ ազնիվ, նորմալ ճանապարհով  ընթանալու համար:

Այսինքն՝ Նիկոլ Փաշինյանի կոչը դատավորներին՝ «խելքներդ գլուխներդ հավաքեք», ընդամենը հանրահավաքային հռետորաբանությո՞ւն էր:

Միանշանակ, իմ գնահատմամբ, այո: Անցումային շրջանի արդարադատության մարմիններ ստեղծելը նույնպես հռետորաբանություն է:

Մի՞թե նոր իշխանությունը չունի ռեսուրս՝ պարզապես փոխելու նախորդ իշխանությունների դատավորներին:

Դա գործընթաց է,որը պետք է իրականացվի: Դատական համակարգին լուրջ փոփոխություններ են պետք, առանձին մարդիկ պետք է լքեն դատական համակարգը: Կարծում եմ կա լիարժեք հնարավորություն, որովհետեւ դատական բոլոր նիստերը արձանագրված են, բոլոր կայացված որոշումները առկա են եւ, կարելի է յուրաքանչյուրի դատավորի կայացրած վճիռների ծաղկաքաղն անելով, պատկերացուըմ կազմել, թե ինչպես են ընդունվել այդ որոշումները: Համոզված եմ՝ որ Նիկոլ Փաշինյանը փառահեղ ձեւով կիրականացնի դա: Սակայն մի բան ակնհայտ է, որ այս գործընթացը պահանջելու է բավական երկար ժամանակ, իսկ հիմա ընթանում են պրոցեսներ, որոնց ընթացքում մարդիկ են հայտնվում դատական համակարգի եւ իրավապահ մարմինների ուշադրությաքն կենտրոնում, որոնք  20 տարիների ընթացքում խիստ ազդեցություն են ունեցել դատաիրավական համակարգի վրա: Կարծում եմ,որ դատավորների մի մասը կաշկանդված է, մի մասը վախեցած է, մի մասը  գործում է ոչ թե իր խղճի, օրենքի եւ իրավունքին համարժեք, այստեղ այլ գործոններ են աշխատում եւ այստեղ էլ մտահոգություններ են առաջանում:

Ինչ վերաբերում է անցումային ինչ-որ համակարգերի, կարծում եմ՝ դրա անհրաժեշտությունը չկա, եթե հանրավորություն լինի,ես ինքս կոնկրետ իմ տեսակետները կարտահայտեմ: Կարծում եմ, որ եղած դատական համակարգը պետք է արագ վերափոխվի:

Իսկ ինչո՞ւ եք դեմ անցումային արդարադատության մարմիններ ստեղծելուն, մտավախություն ունեք, որ դրանք կվերածվեն Լինչի դատաստանի մարմինների՞:

Կարծում եմ՝ մարդիկ խանդով են ընդունում թավյա հեղափոխություն արտահայտությունը, ես այն կուզենայի վերաորակել սահմանադրական կարգի վերականգնում արտահայտությամբ: Տարիներ շարունակ ոտնահարվել է սահմանադրական կարգը, անարդար ընտրությունների արդյունքում Հայստանում վերջին  20 տարիներին եղել է իշխանություն, որը եկել եւ ստանձնել է իշխանական պարտավորություններ՝ը չունենալով այդ լիազորությունը հասարակության կողմից:

Ես դրանում հստակ համոզված եմ եւ կարծում եմ, որ հիմա սահմանադրական կարգն է վերականգնվել:  Միշտ հեղափոխություն բառն ունենում է հակառակ կողմ, օգտագործվում են հակահեղափոխություն, հակահեղափոխական բառերը, որոնք ականջ են ծակում, որ շատ նման են բոլշեւիկյան մեր 70 տարվա ճանապարհի սկզբնահատվածին, որի հետ ասոցիացիա այս  թավշյա հեղափոխությունը չունի, ուստի կարծում եմ, որ բառերի մեջ էլ պետք է մի քիչ զգույշ լինել: Նրանք, ովքեր նախկին իշխանության շրջանակներում եւ շարքերում գործում են այս պրոցեսսի դեմ, նրանք զուտ սահմանադրական կարգի խախտողներ են, ոչ թե հակահեղափոխականներ, ես այսպես կբնութագրեի նրանց:

Վարչապետը միտք հնչեցրեց՝ ովքեր մտավախություն ունեն, որ Հայաստանում կլինի քաղաքացիական պատերազմ, այդ մարդկանցով կզբաղվի ԱԱԾ-ն: Ստացվում է՝ այլակարծություն ունեցողներով ԱԱԾ-ն պետք է զբաղվի՞:

Եկեք դուրս գանք հանրահավաքային հռետորաբանությունից եւ վերադառնանք այն դաշտ,որը կոնստրուկտիվ է, իսկ կոնստրուկտիվ դաշտում այդ էլեմենտը նշանակում է  հետեւյալը. նախեւառաջ չի խոսվում այլախոհության կամ այլախոհների մասին, որովհետեւ միշտ էլ այլախոհներ եղել են եւ կան: Ես էլ շատ հարցերում չեմ կիսում այն կարծիքը, որ ունեն այսօրվա իշխանությունները, բայց այլախոհությունը բացարձակ աղերս չունի քաղաքացիական պատերազմի հետ: Քաղաքացիական  պատերազմ նշանակում է ռազմական ճանապարհով իշխանության փոփոխություն, այդ դեպքում բնականաբար ԱԱԾ-ն էլ, Ոստիկանությունն էլ, բարի կամք ունեցող բոլոր կազմակերպություններն ու անհատները պետք է կանխեն նման բան սադրող կամ դրդող ուժերին, եւ սա դրական է:

Սակայն, արդյոք , բոլո՞րն են սա մեկնաբանում նույն կերպ:

Նիկոլ Փաշինյանը երբեւէ այլախոհների, քաղաքական այլ հայացք ունեցողների դեմ արշավ սկսելու որեւէ ցանկություն, անհրաժեշտություն երբեւէ  չի ուեննա: Եթե դա տեղի ունենա, ապա մենք հասարակությամբ  պետք է մտածենք պայքարել փաշինյանիզմի դեմ, քանի որ դա կլինի շատ բացասական երեւույթ: Բայց ես համոզված եմ՝ Փաշինյանը առաջնորդվում է ազնիվ, մաքուր, մարդասիրական սկզբունքներով եւ առաջնորդվելու է դրանցով մինչեւ իր պաշտոնաթողությունը, որը, տա Աստված, լինի շատ տարիներ հետո:

Ձեզ համար ընդունելի՞ էր, որ 100 օրն ամփոփող հարթակում չկային ԲՀԿ-ն, ԵԼՔ-ը եւ ՀՅԴ-ն:

Ես, ճիշտն ասած, չեմ կարեւորում, թե ով կար հարթակում, քանի որ հանրությունը հարթակում ուզում էր տեսնել մեկ անձի՝ Նիկոլ Փաշինյանին: Մնացածը, թե ով էր հարթակում, հասարակության համար անէական էր: Օրինակ, եթե Արմեն Աշոտյանին Նիկոլ Փաշինյանը տանի կառավարություն, նրա բոլոր բացասական բաները կմոռացվեն, այսպիսին է մեր հասարակությունը, ցավոք:

Կարծում եմ՝ սա կանցնի: Մարդկանց հետաքրքում էր Նիկոլ Փաշինյանը եւ նրա խոսքը, յուրաքանչյուրը հասկացավ իր ձեւով, իսկ բոլոր նրանք, ովքեր ցանկանում էին Նիկոլ Փաշինյանի գործունեության մեջ բացասականը տեսնել, կարծում եմ կարող են իրենց համար մեկնաբանել: Իսկ բարի կամք ունեցողները հասկանում են, որ ամեն ինչ նորմալ է: Բարդ եւ դժվար ճանապարհ ունի Հայաստանն անցնելու, եւ, տա Աստված, որ մենք այդ ճանապարհը կարողանանք անցնել:

Տպել
Partner news