News
Լրահոս
News
Ուրբաթ
Նոյեմբեր 16
Տեսնել լրահոսը


Երեւանի ավագանու արտահերթ ընտրությունների օրը հայտնի է. Կենտրոնական ընտրական հանձնաժողովի որոշմամբ՝ դրանք տեղի կունենան սեպտեմբերի 23-ին: Հանձնաժողովը նաեւ ավագանու ընտրություններին մասնակցելու համար հայտերի ընդունման վերջնաժամկետ է սահմանել սեպտեմբերի 3-ը: Արտահերթ ընտրությունների ժամանակ քարոզարշավի ժամկետը կրճատվում է: Այս անգամ քարոզարշավը կտեւի 11 օր՝ կմեկնարկի սեպտեմբերի 10-ին եւ կավարտվի սեպտեմբերի 21-ին:

Ի տարբերություն 2017 թվականի՝ «Ելք»-ն այս անգամ ընտրություններին դաշինքով չի մասնակցի: Վարչապետ Նիկոլ Փաշինյանի «Քաղաքացիական պայմանագիր» կուսակցությունն ընտրություններին կմասնակցի միայնակ. այստեղ քաղաքապետի թեկնածու են առաջադրել դերասան Հայկ Մարությանին: «Ելք»-ի մյուս՝ «Լուսավոր Հայաստան» եւ «Հանրապետություն» կուսակցությունների թեկնածուն էլ արդարադատության նախարար Արտակ Զեյնալյանն է: Գագիկ Ծառուկյանի «Բարգավաճ Հայաստան» կուսակցության թեկնածուն պատգամավոր Նաիրա Զոհրաբյանն է, «Ժառանգությունն» էլ որոշել է առաջադրել կուսակցության հիմնադիր Րաֆֆի Հովհաննիսյանին: Երեւանի ավագանու ընտրություններին մասնակցելու մասին հայտնել են քաղաքական այլ ուժեր եւս:

Մարտի 1-ի գործի շրջանակում Ռոբերտ Քոչարյանի առանձնատանն ու գրասենյակում խուզարկություն է կատարվել: Հատուկ քննչական ծառայությունում հաստատել են լուրը, սակայն այլ մանրամասներ հրաժարվել են հայտնել: Նախաքննության գաղտնիքը պատճառաբանելով՝ խուզարկությունից մանրամասներ չեն հայտնում նաեւ Հայաստանի երկրորդ նախագահի փաստաբանները: Նրա գրասենյակի ղեկավարը, սակայն, նշել է, որ խուզարկությունը կատարվել է 2-3 շաբաթ առաջ՝ տարակուսանք հայտնելով, թե ինչու է տեղեկությունը հիմա տարածվել:  Վիկտոր Սողոմոնյանի խոսքով՝ գրասենյակում խուզարկել են Ռոբերտ Քոչարյանի աշխատասենյակը:

Ավելի ուշ պարզաբանում է տարածել Հատուկ քննչական ծառայությունը՝ նշելով, որ խուզարկության մասին չեն տեղեկացրել, քանի որ չեն կարեւորել այդ հանգամանքը: Հիշեցնենք, որ առաջին ատյանի որոշմամբ 2 ամսով կալանավորված Ռոբերտ Քոչարյանին Վերաքննիչ դատարանն օգոստոսի 13-ին ազատ արձակեց նիստերի դահլիճից՝ հաշվի առնելով երկրորդ նախագահի անձեռնմխելիությունը:

Նախկին վարչապետ Հովիկ Աբրահամյանի վարորդի եղբորը՝ Ամբիկ Գեւորգյանին մեղադրանք է առաջադրվել: Նրա նկատմամբ խափանման միջոց է ընտրվել ստորագրություն չհեռանալու մասին: Ամբիկ Գեւորգյանին ձերբակալել էին փաստացի նրա անունով գրանցված, բայց Հովիկ Աբրահամյանին պատկանող նախկին գործարանի տարածքում Ազգային ավտանգության ծառայության իրականացրած խուզարկությունից հետո: ԱԱԾ-ն այստեղ ապօրինի պահվող մեծ քանակությամբ զենք եւ ռազմամթերք էր հայտնաբերել: Կասկածներ կան, որ դրանք կարող են 2008 թվականի մարտի 1-ի եւ 2-ի իրադարձությունների ժամանակ օգտագործված լինել ցուցարարների դեմ: Գործով ձերբակալվել, ապա կալանավորվել է նաեւ Հովիկ Աբրահամյանի եղբայրը՝ Հենրիկ Աբրահամյանը:

Արմավիրի մարզում տեղացած հերթական հորդառատ անձրեւները լուրջ վնաս են հասցրել գյուղատնտեսությանը: Մասնավորապես, Շենիկ, Քարակերտ եւ Դալարիկ համայնքներում բերքի մեծ մասը ոչնչացել է: Տեղաբնակներն ասում են՝ այսքան հզոր սելավ վերջին 10 տարիներին չի եղել: Բնության տարերքը մի քանի տասնյակ տոննա ձմերուկի բերքը ոչնչացրել է, մի քանի գյուղացիներ էլ ստիպված են եղել ջրից փրկել խոշոր եղջերավոր անասուններին: Ջուրը ողողել է նաեւ խաղողի այգիները, լցվել տների նկուղներն ու անասնագոմերը: Տեւական անձրեւի հոսքն այս համայնքներով անցնող ջրատարը չի կարողացել հեռացնել: Արդյունքում ջրահեռացման համակարգը նույնպես վնասվել է: Մարզպետարանի աշխատանքային խումբն արդեն ուսումնասիրություն է սկսել՝ արտակարգ իրավիճակի հետեւանքով պատճառված վնասները գնահատելու համար:

Թբիլիսիում խոշոր ավտովթարի հետեւանքով Հայաստանի 9 քաղաքացի հիվանդանոցներ են տեղափոխվել: Կեսգիշերն անց Վրաստանի մայրաքաղաքի Էլիավա շուկայի մոտակայքում բախվել են «Mercedes Minivan» եւ «Mercedes CLK» մակնիշների մեքենաները: Տուժածների թվում 7-ամյա երեխա կա: Հոսպիտալացվածներից մեկի՝ 37-ամյա Արամ Խաչատրյանի վիճակը բժիշկները ծանր են գնահատել: Ավելի ուշ տեղեկություն է ստացվել, որ վիրավորներից 29-ամյա Մարիա Պանյանը մահացել է:

Մահացել է ՄԱԿ-ի նախկին գլխավոր քարտուղար Քոֆի Անանը: Նա վախճանվել է կարճատեւ հիվանդությունից հետո: Անանը 80 տարեկան էր: Քոֆի Անանը Միացյալ ազգերի կազմակերպության (ՄԱԿ) 7-րդ գլխավոր քարտուղարը. նա կառույցը ղեկավարել է 1997-ից 2006 թվականներին: 2001 թվականին արժանացել է Խաղաղության Նոբելյան մրցանակի: Քոֆի Անանին մարդասիրական գործունեության իսկական առաջնորդ եւ խաղաղության մարտիկ էին անվանում: Կարմիր Խաչի միջազգային կոմիտեի ղեկավարը նրա մահն ամբողջ աշխարհի համար մեծ կորուստ է համարում:

Օգոստոսի 20-ին դոլարը փոքր-ինչ նվազել է, եվրոն եւ ռուբլին՝ թանկացել: Դոլարի փոխարժեքը կազմել է 483 դրամ, եվրոյինը՝ 551, ռուբլունը՝ 7 դրամ 20 լումա, ֆունտինը՝ 615 դրամ:

Օգոստոսի 21-ին երեկոյան ժամերին հանրապետության հյուսիսային շրջաններում սպասվում է անձրեւ եւ ամպրոպ, առանձին հատվածներում՝ կարկուտ: Օդի ջերմաստիճանը 5-7 աստիճանով կբարձրանա: Երեւանում նույնպես առանձին հատվածներում հնարավոր են տեղումներ: Մայրաքաղաքում գիշերը կդիտվի +16+18, ցերեկը՝ +30+32 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով»․ 15․11․2018
Վճռաբեկ դատարանը որոշեց մասնակի բավարարել Քոչարյանի գործով գլխավոր դատախազի բողոքը․․․
Օրվա գլխավոր լուրերը՝ «մեկ տողով»․ 14․11․2018
Նախորդ օրերի գլխավոր ինտրիգը, թե որ ուժը ինչ կազմով կմասնակցի արտահերթին, այսօր լուծվեց․․․
Օրվա գլխավոր լուրերը՝ «մեկ տողով»․ 13․11․2018
«Իմ քայլը» դաշինքի ցուցակի առաջին եռյակը հայտնի է՝ Նիկոլ Փաշինյան, Արարատ Միրզոյան, Լենա Նազարյան․․․
Օրվա գլխավոր լուրերը՝ «մեկ տողով»․ 12․11․2018
Նոր խորհրդարանում ՀՀԿ-ն ուզում է ձևավորել Փաշինյանի թիմի հակառակ բևեռը, և ըստ Վիգեն Սարգսյանի, ընտրությունը լինելու է հենց այս բևեռների միջև․․
Օրվա գլխավոր լուրերը՝ «մեկ տողով»․ 09․11․2018
Կրկնակի ռեկորդով չեմպիոնական հաղթանակ․ Աշգաբադում ընթացող ծանրամարտի աշխարհի առաջնությանը Սիմոն Մարտիրոսյանը նվաճել է չեմպիոնի կոչումը․․․
Օրվա գլխավոր լուրերը՝ «մեկ տողով»․ 08․11․2018
Վարչապետի պաշտոնակատար Նիկոլ Փաշինյանն աշխատանքային այցով Աստանայում է․․․
Partner news