Թբիլիսիում տեղի ունեցած ավտովթարի մեղավորին, որի հետեւանքով Հայաստանի քաղաքացիներ են տուժել, դեռ չեն պարզել: Այս մասին հաղորդում է Վրաստանի ՆԳՆ մամուլի ծառայությունը, գրում է «Նովոստի Գրուզիա»-ն:
ՃՏՊ-ն տեղի է ունեցել անցյալ գիշեր, Թբիլիսիի Էլիավա շուկայի մերձակայքում: Mercedes մակնիշի միկրոավտոբուսը, որում Հայաստանի 9 քաղաքացի է եղել, բախվել է նույն մակնիշի թեթեւ մարդատար ավտոմեքենայի:
Հայաստանի բոլոր քաղաքացիները տարբեր ծանրության վնասվածքներ են ստացել եւ հոսպիտալացվել տարբեր բուժկենտրոններԼ: Տուժածներից մեկի կյանքը փրկել չի հաջողվել: Տուժել է նաեւ թեթեւ մարդատար մեքենայի վարորդը:
Նախնական տվյալներով՝ Հայաստանի քաղաքացիները միկրոավտոբուսով մեկնում էին Ուրեկի՝ հանգստի:
Դեպքի առիթով քրեական գործ է հարուցվել՝ «երթեւեկության անվտանգության կանոնների խախտումը կամ տրանսպորտային միջոցի շահագործումը, որը մարդու մահ է առաջացրել» հոդվածով, որը 4-7 տարի ժամկետով ազատազրկում է նախատեսում: