Հանրաքվեի ինստիտուտը պետք է շատ ուժեղացվի, այո, պետք է լինեն հարցեր, որոնք լուծվեն հանրաքվեով: Այս մասին, այսօր՝ օգոստոսի 22-ին, հայ-չինական դպրոցի բացման արարողության ժամանակ, լրագրողների հետ զրույցում նշեց ՀՀ վարչապետ Նիկոլ Փաշինյանը:
«Որովհետեւ մեր հանրությունը տեսավ, որ ինքը կարող է որոշումներ կայացնել ու ինքը հիմա ոչ թե պետք է անընդհատ հեղափոխություն իրականացնի, այլ պետք է մենք ստեղծենք ինստիտուտներ, որը հանրությանը հնարավորություն կտա կարեւորագույն հարցերի վերաբերյալ, եւ այն հարցերի վերաբերյալ ինքը գտնում է, որ պետք է իր տեսակետը հաշվի առնելով լուծվի, այդ հնարավորությունը պետք է ունենա»,-ասաց նա:
Հարցին, թե երբ է մտադիր հանրաքվեի դնել ԱԺ-ն ցրելու վերաբերյալ սահմանադրական փոփոխությունը, Նիկոլ Փաշինյանը պատասխանեց. «Այն ինչ ասվեց Հանրապետության հրապարակում, պետք է ընդունել ի գիտություն, բայց այնպես չէ, որ լուծման միայն մեկ տարբերակ կա: Կոնկրետ առաջարկվեց մեկ տարբերակ, մենք կունենանք հանդիպումներ, քննարկումներ: Թեման հետեւյալն է. մենք պետք է հասկանանք, որ ժողովրդի հաղթանակը անշրջելի է: Ես բոլորին կոչ եմ անում որեւէ բան չձեռնարկել այս թեզը թեկուզ տեսականորեն կասկածի տակ դնելու համար: Պարզ է, որ Հայաստանում ժողովուրդը թույլ չի տա կոռուպցիայի, ապօրինությունների, ամենաթողության վերադարձ: Ես որեւէ մեկին խորհուրդ չեմ տալիս այս հարցը փորձել դարձնել օրակարգի հարց:
Որովհետեւ նախ դա չի բխում Հայաստանի պետության ու ժողովրդի շահերից, երկրորդ՝ մտածողության էս վեկտորը այսօր Հայաստանում չունի որեւէ հեռանկար եւ երբեք այլեւս չի ունենալու հեռանկար»:
Ավելի վաղ NEWS.am-ը հայտնել էր, որ օգոստոսի 17-ին Հանրապետության հրապարակում իր ելույթում Նիկոլ Փաշինյանը նշել էր, որ իրենք կնախաձեռնեն սահմանադրական փոփոխություն, որը թույլ կտա առանց վարչապետի հրաժարականի հասնել ԱԺ լուծարման եւ նոր ընտրությունների անցկացման: Խոսքը այն մասին է, որ Սահմանադրությամբ հնարավորություն տրվի, որ ԱԺ-ն ինքն իրեն լուծարելու հնարավորություն ունենա:
