Հայաստանը եւ Գերմանիան կարող են զարգացնել համագործակցությունը մի շարք ուղղություններով: Այս մասին Երեւանում կայացած մամուլի ասուլիսի ժամանակ հայտարարել է Գերմանիայի կանցլեր Անգելա Մերկելը:
Շնորհակալություն հայտնելով ջերմ ընդունելության համար, Կանցլերը նշեց, որ ուրախ է գալ Հայաստան ոչ միայն Առաջին Հանրապետության 100-ամյակի տարում, այլեւ՝ ժողովրդավարական բարեփոխումների ժամանակաշրջանում:
«Երեւանը 2800 տարեկան է: Հայաստանը հարուստ մշակույթ ու պատմություն ունեցող երկիր է: Սակայն այն բաց է նաեւ նորի, ապագայի համար»,- նշել է Գերմանիայի կանցլերը՝ արձանագրելով, որ Գերմանիայում հետեւել են Հայաստանում տեղի ունեցող իրադարձություններին, խաղաղ հանրահավաքներին եւ թավշյա հեղափոխությանը:
Նրա խոսքով՝ վարչապետ Նիկոլ Փաշինյանի հետ հանդիպման ընթացքում նրանք քննարկել են երկու երկրների հարաբերությունները, խոսել են այն մասին, թե ինչպիսին պետք է լինեն հետագա հարաբերությունները ոչ միայն երկկողմ ձեւաչափով, այլեւ՝ ԵՄ-ի հետ հարաբերությունների ձեւաչափով:
«Հարաբերությունները լավն են, սակայն դրանք կարող են էլ ավելի ընդլայնվել»,- նշել է Կանցլերը՝ համագործակցության խոստումնալից հարաբերությունների շարքում նշելով տնտեսությունը, տեղեկատվական տեխնոլոգիաները, կրթությունը, գիտությունը: Կողմերը անդրադարձել են նաեւ Գերմանիայում ապաստան հայցող հայաստանցիների հարցին: «Մենք ուրախ ենք Հայաստան-ԵՄ համաձայնագրի ստորագրման կապակցությամբ եւ պատրաստ ենք նպաստել դրա իրականացմանը»,- ասել է Մերկելը: