Սահմանախախտման հերթական դեպքը: Հայ-թուրքական սահմանի Արտաշատի տեղամասում Պակիստանի երկու քաղաքացու են բռնել: Սահմանապահ ջոկատը նրանց նկատել է դեռեւս Թուրքիայի տարածքում. մտադիր էին լողալով անցնել Արաքսը: Մի քանի ժամ անց հատել են պետական սահմանն ու փորձել թաքնվել Հայաստանի տարածքում: Կարճատեւ հետապնդումից հետո տղամարդկանց բռնել են: Ընդ որում՝ ձերբակալման ընթացքում պակիստանցիները փորձել են դիմադրություն ցույց տալ, սակայն արագորեն վնասազերծվել են եւ փոխանցվել Հայաստանի իրավապահ մարմիններին: Վերջինները փորձում են պարզել պետական սահմանի խախտման նպատակներն ու դրդապատճառները:
Նիկոլ Փաշինյանն այսօր հանդիպել է Արա Բաբլոյանի հետ: Վարչապետն ու Ազգային ժողովի նախագահը խոսել են Հայաստանում խոսքի ազատության, դատարանների անկախության, «անցումային արդարադատության» ինստիտուտի մասին: Նրանք նաեւ արձանագրել են, որ արտահերթ խորհրդարանական ընտրություններն անհրաժեշտ է անցկացնել առավելագույնը մեկ տարվա ընթացքում:
Հանդիպման նախաձեռնությամբ հանդես էր եկել Արա Բաբլոյանը. նա մտահոգություն էր հայտնել երկրի ներքաղաքական իրավիճակի շուրջ, իսկ Նիկոլ Փաշինյանին մեղադրել պատգամավորներին ճնշելու փորձի մեջ: Վարչապետն իր հերթին հայտարարել էր, որ ոչ մի ճնշում չկա, եւ կոչ արել հաշվի առնել ժողովրդի կարծիքն ու առկա իրողությունները:
Իսկ Փաշինյան-Բաբլոյան հանդիպմանն անդրադարձել է նաեւ երկրի նախագահը: Արմեն Սարգսյանը դրական է գնահատել արձանագրված պայմանավորվածությունները եւ հույս հայտնել, որ առաջիկայում կտեսնենք դրական արդյունքներ:
«Լուսավոր Հայաստան» եւ «Հանրապետություն» կուսակցությունները Երեւանի ավագանու ընտրություններին մասնակցելու նպատակով դաշինք են կազմել: Այսօր հրավիրած հավաքին հայտնել են դաշինքի անունն ու ընտացուցակի առաջին երեք հորիզոնականը զբաղեցնողների անունները: «Լույս» դաշինքի քաղաքապետի թեկնածուն երեւանցիների աջակցությունն է ակնկալում:
«Լուսավոր Հայաստան» եւ «Հանրապետություն» կուսակցությունները, հիշեցնենք, 2017 թվականին տեղի ունեցած ավագանու ընտրություններին մասնակցում էին «Քաղաքացիական պայմանագրի» հետ՝ «Ելք» դաշինքով: Այս ընտրություններին, սակայն, Նիկոլ Փաշինյանի կուսակցությունը որոշեց միայնակ մասնակցել ընտրություններին: «Քաղաքացիական պայմանագրի» քաղաքապետի թեկնածուն դերասան Հայկ Մարությանն է:
Վարչապետն այսօր շուկա էր գնացել: Նիկոլ Փաշինյանը փորձել է տեղում պարզել գյուղմթերքի թանկացման մասին լուրերը: Որոշ տվյալներով՝ 2017 թվականի համեմատ՝ գյուղատնտեսական արտադրանքի գները բարձրացել են միջինը 100-150 տոկոսով: Լոլիկի եւ վարունգի գներն ապշեցրել են նրան:
Վաճառականները նաեւ դժգոհել են, որ առեւտուրը, նախորդ տարիների համեմատ, այնքան էլ աշխույժ չէ: Պատճառներից մեկն այն է, որ մարդիկ սուպերմարկետից են գնումներ կատարում: Բացի այդ՝ հող մշակողներն են քիչ:
Լրագրողների հարցին ի պատասխան՝ վարչապետը վստահեցրել է, որ կառավարությունը չի ցանկանում ազդել գնագոյացման վրա: Նիկոլ Փաշինյանն ասել է, որ Կենտրոնական բանկ է գնում. այնտեղ պատրաստվում է նաեւ գնաճի թեման քննարկել: Քննարկումից մանրամասներ դեռեւս չեն հրապարակվել:
Ամուլսարում այսօր լարված իրավիճակ էր: Հայկական բնապահպանական ճակատի տեղեկացմամբ՝ «Լիդիան Արմենիա»-ի ղեկավարությունն առավոտյան փորձել է իր աշխատակիցներին հանքի տարածք մտցնել, սակայն լեռան պահապանները թույլ չեն տվել:
«Լիդիան Արմենիա»-ի մեքենաները փակել են Ջերմուկ տանող ճանապարհը եւ հրաժարվել հանել դրանք: Իրավիճակին խառնվել են իրավապահները. նրանք 20 րոպե ժամանակ են տվել ճանապարհը բացելու համար: Ակտիվիստներն ընկերության գործողությունները սադրանք են որակել:
Մինչ այդ, Հայաստանի բնապահպանության եւ ընդերքի տեսչական մարմնի ղեկավարը «Լիդիան Արմենիա» ՓԲԸ կողմից առանց ընդերքօգտագործման իրավունքի լեռնային զանգված արդյունահանելու փաստի կապակցությամբ դիմել է գլխավոր դատախազին՝ տվյալ արարքում հանցակազմի առկայությունը պարզելու եւ սահմանված կարգով ընթացք տալու համար: Ամերիկաբրիտանական «Լիդիան Արմենիան» Ամուլսարի ոսկու հանքի շինարարությունը սկսել է երկու տարի առաջ՝ հայտարարելով, որ կներդնի ավելի քան 400 միլիոն դոլար: Ամուլսարում ոսկու արդյունահանման իրավունք ստացած ընկերությունը վստահեցնում է, որ բնապահպանական որևէ վտանգ չկա:
Կյանքից հեռացել է «Արարատ»-ի լեգենդար դարպասապահ Ալյոշա Աբրահամյանը: Օգոստոսի 28-ին Աբրահամյանը 73 տարեկան կդառնար: Նա տեւական ժամանակ հիվանդ էր: Ծնունդով Լենինականից Ալյոշա Աբրահամյանը 1973 թվականին «Արարատ»-ի կազմում դարձել է ԽՍՀՄ չեմպիոն ու գավաթակիր: ԽՍՀՄ առաջնությունում նա «Արարատի» կազմում 276 հանդիպում է անցկացրել: Ֆուտբոլիստի կարիերան ավարտելուց հետո մարզչական աշխատանքով էր զբաղվում: Հայկական ֆուտբոլի զարգացման գործում ներդրած նշանակալի ավանդի համար 2013 թվականին պարգեւատրվել է «Հայրենիքին մատուցած ծառայությունների համար» առաջին աստիճանի մեդալով:
81 տարեկանում մահացել է ԱՄՆ հանրապետական սենատոր Ջոն Մաքքեյնը: Նա երկար ժամանակ բուժվում էր գլխուղեղի քաղցկեղից, սակայն օրերս հայտնել էր, որ դադարեցնում է բուժումը՝ կապված հիվանդության անշրջելի զարգացման հետ: Մաքքեյնին կհուղարկավորեն սեպտեմբերի 2-ին, Մերիլենդի Անապոլիս քաղաքում:
Սենատորի այրին աշխարհի տարբեր ծայրերից ցավակցական հեռագրեր է ստանում, իսկ Սպիտակ տունը մինչեւ հիմա պաշտոնական ցավակցական ուղերձ չի հրապարակել: Ամերիկյան մամուլի տեղեկություններով՝ արդեն պատրաստ հայտարարությունն արգելել է տարածել նախագահ Դոնալդ Թրամփը: Նա որոշել է բավարարվել միայն Twitter-ում գրառմամբ: Ավելին, Թրամփին նաեւ հուղարկավորությանը չեն հրավիրել: Թրամփը թշնամացել է Մաքքեյնի հետ, քանի որ սենատորը մշտապես քննադատում էր նախագահին, այդ թվում՝ Ռուսաստանի հանդեպ, նրա կարծիքով, մեղմ քաղաքականության համար:
Ջոն Մաքքեյնի մահվան կապակցությամբ հաղորդագրություն է տարածել նաեւ Ամերիկայի Հայ դատի հանձնախումբը՝ նշելով, որ 1988-1994 թվականների ազատագրական պատերազմի ժամանակ սենատորն իր աջակցությունն է հայտնել Արցախի ազատագրմանը, Հայոց ցեղասպանության զոհերի ժառանգներին փոխհատուցելու կողմնակիցն է եղել:
Հայաստանում է «պոկերի արքա» Դեն Բիլզերյանը: Instagram-ի ամերիկահայ աստղը եղբոր՝ Ադամ հետ Հայաստանի քաղաքացիություն է ստացել: Նրանց հայրը՝ Փոլ Բիլզերյանը, նույնպես Հայաստանի քաղաքացի է. նա հայկական անձնագիր է ստացել տարիներ առաջ: Դենը նաեւ, ընթացակարգի համաձայն, հաշվառվել է Հայաստանի զինված ուժերում:
Վաղ առավոտյան Հայաստան ժամանած Բիլզերյան եղբայրներն այսօր հասցրել են նաեւ զբոսնել Երեւանի կենտրոնում, իսկ ավելի ուշ մեկնել Սեւան՝ հանգստի:
Օգոստոսի 27-ին դոլարն էժանացել է, եվրոն եւ ռուբլին՝ թանկացել: Դոլարի փոխարժեքը կազմել է 482 դրամ, եվրոյինը՝ 560, ռուբլունը՝ 7 դրամ 18 լումա, ֆունտինը՝ 620 դրամ:
Օգոստոսի 28-ին հանրապետության հյուսիսային շրջաններում սպասվում է կարճատեւ անձրեւ եւ ամպրոպ: Օդի ջերմաստիճանն էապես չի փոխվի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +20+22, ցերեկը՝ +34+36 աստիճան տաքություն: