Հաղթական տրամադրվածությամբ ենք եկել, որովհետեւ իմ ձեռքին է մի ցուցակ, որտեղ ներառված են քաղաքացիներ, մասնագետներ, որոնք պատրաստ են ստանձնել քաղաքային կառավարումը, դրա համար ունեն գիտելիքների բազա: Այս մասին, ԿԸՀ-ում լրագրողների հետ զրույցում նշել «Լույս» դաշինքի ներկայացուցիչ Դավիթ Խաժակյանը:
«Ցուցակը գլխավորում է Արտակ Զեյնալյանը, մեր ապագա քաղաքապետի թեկնածուն, երկրորդ տեղում ես եմ, երրորդում Երեւանի ավագանու անդամ Անի Խաչատրյանն է, 4-րդում՝ Անի Սամսոնյանը: 5-րդ տեղում ավագանու անդամ Հարություն Բաբայանն է: Այնուհետեւ գալիս են Տիգրան Տեր-Մարգարյանը, «Ռեպատ Արմենիա»-ի ղեկավար Վարդան Մարաշլյանը»,-ասաց նա:
Խաժակյանի խոսքով՝ Արտակ Զեյնալյանը անցել է այնպիսի ճանապարհ, որը եզակի է քաղաքական գործիչների համար, ունի բոլոր հմտությունները, որով հնարավոր կլինի քաղաքի խնդիրները լուծել: «Նա ունենալով փայլուն իրավական գիտելիքներ, կառավարչական հմտություններ, կարող է ստանձնել քաղաքային տնտեսւթյան մեծ բեռը: Մենք Զեյնալյանին տեսնում ենք ընտրովի ամենամեծ պաշտոնում՝ Երեւանի քաղաքապետի պաշտոնում»,-ասաց նա:
Խաժակյանը նշեց, որ իրենց ցուցակը բաղկացած է խորհրդանշական 111 անունից:
Անդրադառնալով «Լույս» դաշինքի շանսերին, Խաժակյանն ասաց. «Հաղթանակը ենթադրում է ձայների մեծամասնությունը, թե ինչ տոկոսային հարաբերությամբ, որոշելու են մեր քաղաքացիները, բայց մենք ունենք մեծամասնության հավակնություն: Շանսերը գնահատում եմ հաղթական, բայց դրանք չեմ դիտարկում որեւէ մեկի հետ համեմատականության մեջ»,-ասաց նա:
«Լույս» դաշինքը առաջարկում է Երեւանում կուտակված խնդիրների կոնկրետ եւ ժամակացուցային լուծումներ, առաջարկում է զարգացում: Կարգախոսը չեմ բացահայտի, բայց մեր ծրագիրը Երեւանի արդար եւ արդյունավետ կառավարումն է: Ծրագիրն արդեն պատրաստ է, սպասում ենք քարոզարշավին, որ հրապարակենք»,-իր խոսքն ամփոփեց Խաժակյանը:
Նշենք, որ «Լույս» դաշինքի ցուցակն ունի հետեւյալ տեսքը. Արտակ Զեյնալյան, Դավիթ Խաժակյան, Անի Խաչատրյան, Անի Սամսոնյան, Թեհմինա Վարդանյան, Անահիտ Բախշյան, Հարություն Բաբայան, Տիգրան Տեր-Մարգարյան, Վարդան Մառաշլյան, Անդրանիկ Հակոբյան: