Երեւանցին ձայն կտա ՀՅԴ-ի քաղաքապետի թեկնածուին: Այսօր՝ օգոստոսի 29-ին ԿԸՀ-ում լրագրողների հետ զրույցում նման համոզմունք հայտնեց ՀՅԴ Հայաստանի Գերագույն մարմնի անդամ Վահագն Մատինյանը:
Նա նաեւ նշեց Երեւանի ավագանու արտահերթ ընտրություններում ՀՅԴ-ի ցանկի առաջին եռյակի անունները. առաջին տեղում ԱԺ նախկին պատգամավոր Միքայել Մանուկյանն է, երկրորդ տեղում՝ «Երկիր Մեդիա» հեռուստաընկերության տնօրենի պաշտոնը զբաղեցնող Դավիթ Հակոբյանը, երրորդ հորիզոնականում՝ ՀՅԴ Երեւան քաղաքի կոմիտեի ներկայացուցիչ Խաչատուր Ստեփանյանը:
Ընդհանուր առմամբ, ՀՅԴ-ի ցանկում 77 անձ է ներառված:
Լրագրողների հարցին ի պատասխան՝ Վահագն Մատինյանը նշեց, որ բոլոր քաղաքական ուժերին իրենց մրցակից են համարում, միաժամանակ, սակայն, համոզմունք հայտնեց, որ երեւանցին ձայն կտա իրենց թեկնածուն:
«Երեւանցին Դաշնակցությանը ձայն կտա, քանի որ մեր քաղաքապետի թեկնածուն երեւանցի է, մեծ սեր եւ հարգանք է վայելում: Մեր թեկնածուները հիմնականում բարձր պրոֆեսիոնալիզմով անձնավորություններ են, ովքեր լավ գիտեն իրենց գործը»,- հավելեց ՀՅԴ հայաստանյան կառույցի անդամը:
Ծրագրային առանձնահատկությունների մասին Մատինյանը ոչինչ չասաց, խորհուրդ տվեց սպասել. առաջիկայում հրապարակելու են: Իսկ ավագանու այս ընտրություններին ՀՅԴ-ն մասնակցելու է «Միասին՝ հանուն Երեւանի» կարգախոսով:
Լրագրողների դիտարկմանը, թե, մամուլի հրապարակումների համաձայն, ՀՅԴ-ի քաղաքապետի թեկնածուն քրեական գործով՝ Երեւանի քաղաքապետ Համբարձում Գալստյանի սպանության գործով մեղադրյալ է եղել, Վահագն Մատինյանն ասաց՝ 1994 թվականին ՀՅԴ-ն այդ ժամանակվա իշխանությունների կողմից արգելվեց, իսկ կուսակցության ամբողջ վերնախավը, այդ թվում՝ Միքայել Մանուկյանը, շինծու գործերով ձերբակալվեց:
«Եթե այդ գործը շինծու չլիներ, հետո նա ազատ չէր արձակվի»,- հավելեց Վահագն Մատինյանը:
