Միացյալ Նահանգները, որն առաջ է մղում մերձավորարեւելյան հակամարտության կարգավորման իր ծրագիրը, պաղեստինցիներին առաջարկել է Հորդանանի հետ կոնֆեդերացիա ստեղծել: Այս մասին հայտնել է իսրայելական հեռուստատեսության 10-րդ ալիքը՝ վկայակոչելով Իսրայելի ՀԿ-ների ներկայացուցիչներին, որոնց հետ կիրակի Ռամալլահում հանդիպել է Պաղեստինի նախագահ Մահմուդ Աբասը:
Հեռուստաալիքի տեղեկություններով՝ ԱՄՆ նախագահի ավագ խորհրդական եւ փեսա Ջարեդ Քուշները եւ միջազգային բանակցություններում վաշինգթոնյան վարչակազմի հատուկ ներկայացուցի Ջեյսոն Գրինբլաթը Աբասին առաջարկել են «հրաժարվել պաղեստինյան անկախ պետության գաղափարից՝ Հորդանանի հետ կոնֆեդերացիայի օգտին»:
Մինչդեռ «Ալ Մայադին» հեռուստաալիքի տեղեկություններով՝ ի պատասխան Աբասն ասել է. «Ես պատրաստ եմ համաձայնվել, սակայն մի պայմանով, որ կոնֆեդերացիայի մի մաս լինի Իսրայելը»:
Միաժամանակ, i24news լրատվական պորտալի տեղեկություններով՝ Հորդանանը հայտարարել է, որ կոնֆեդերացիայի հարցը «բանավեճի հարց չէ»:
Հորդանանի հետ կոնֆեդերացիայի մեջ պաղեստինյան տարածքները միավորելու գաղափարը նոր չէ, սակայն այս թեման 1993 թվականից հետո չի բարձրացվել Օսլոյում համաձայնագիրը կնքելու պահից սկսած, որն ուղղված էր պաղեստինա-իսրայելական կարգավորմանը հասնելուն եւ նախատեսում էր Արեւմտյան ափին Գազայի հատվածում Պաղեստինյան վարչակազմի ստեղծում: