Ներդրումների ցուցանիշների հարցում պետք է ավելի նրբանկատ լինել եւ հետայսու քննարկման առարկա դարձնել ազգային վիճակագրական կոմիտեի հրապարակված ցուցնաիշները, որոնք վերաբերում են համախառն կուտակմանը: Այս մասին, այսօր՝ սեպտեմբերի 3-ին, իր գործունեության 100 օրն ամփոփող ասուլիսում հայտարարեց Տնտեսական զարգացման եւ ներդրումների նախարար Արծվիկ Մինասյանը:
«Սա մի ցուցանիշ է, որն ավելի մոտ է ներդրում ասված հասկացությանը, քան որեւէ այլ ցուցանիշ, որն ընդհանուր ներդրումների մասնակի դրսեւորումներ են:
Ներդրումներին մասնակցում են երկու ուղղություններով՝ մեկը օտարերկրյա ներդրումներն են, մյուսը ներքին ռեսուրսներն են, կամ ներքին ներդրումներն են: Երբ հրապարակվում է օտարերկրյա ներդրումները, պետք է նկատի առնենք, որ խոսքը ֆինանսական հոսքերի մասին է, թե որքան ռեսուրս է ֆինանսի տեսքով մտել Հայաստան եւ որքան է դուրս եկել:
Պատկերացրեք ձեր բարեկամը Գերմանիայից ներդրում է կատարում Հայաստանում, այսինքն փող է փոխանցում եւ գործարան է կառուցում, ասենք 200 մլն դոլարի: Միաժամանակ, երկրից 280 մլն դոլար գնում է նախկին վարկային պարտավորությունների մարմանը: Երբ հրապարակվում է զուտ հոսքը, ստացվում է մինուս 80 մլն դոլար, մինչդեռ դա իրական պատկերը չի արտացոլում, որովհետեւ 200 մլն դոլարի ներդրում այստեղ չի երեւում»,-ասաց նախարարը:
Նրա խոսքով, 2018-ի առաջին կիսամյակում իրական հատվածում օտարերկրյա ընդհանուր ներդրումների ծավալը զուտ հոսքերի ծավալը կազմել մինուս 53,1 մլն դոլար, որը պայմանավորված է վերը նշված պատտճառներով:
«Ընդհանուր օտարերկրյա ուղղակի ներդրումների ծավալը 81,3 մլն դոլար է: Ըստ ուղղվածության այս գումարներն ուղղվել են հիմնականում վերամշակող արդյունաբերության, առեւտուր, շինարարություն, վարչարարական եւ օժանդակ այլ հատվածներ»,-ասաց նա:
Արծվիկ Մինասյանը նշեց, որ մայիսի 15-ից հետո մեծ թվով քաղաքացիներ եւ ընկերությունների ներկայացուցիչներ են դիմել նախարարություն, որոնց իրենց ցանկությունն են հայտնել ներդրումներ անել Հայաստանում: «Որոշակի ներդրումների ծավալների մասին հայտարարություններ են արել: Եթե այդ բոլոր թվերը ի մի բերենք, դրանք անցնում են մեկ մլրդ դոլարը: Բայց մենք փորձում ենք նաեւ գնահատել, թե իրատեսականը տեսանելի ժամանակահատվածում որքան կկազմեն ներդրումները: Դրանից առնվազն 240 մլն դոլարը իրատեսական է: Հիմա աշխատում ենք այդ կազմակերպությունների հետ, որպեսզի նրանք կարողանան բիզնես պլանների միջոցով փորձեն դրանք վերածել ներդրումների»,-ասաց նա:
Հայաստանում օտարերկրյա ուղղակի ներդրումները 43.5%-ով նվազել են. տնտեսագետները՝ պատճառների մասին
