Facebook սոցիալական ցանցը չափազանց լայն է մեկնաբանում «ահաբեկչություն» հասկացությունը, որը կարող է հանգեցնել կառավարության կողմից ընդդիմության հետապնդմանը։ Այս մասին հայտարարել է  ահաբեկչության դեմ պայքարի պայմաններում մարդու իրավունքների եւ հիմնարար ազատությունների պաշտպանության հարցերով հատուկ զեկուցող  Ֆոննուալա Նի Օլանը, փոխանցում է «ՌԻԱ Նովոստի»–ն։

ՄԱԿ-ի փախստականների հարցերով գերագույն հանձնակատարի գրասենյակի (ՄԱԿ ՓԳՀ) կողմից տարածած հայտարարությունում նշվում է, որ Նի Օլանը նամակ է հղել Facebook–ի նախագահ Մարկ Ցուկերբերգին, որում մտահոգություն է հայտնել ընկերության կողմից «ահաբեկչություն» հասկացության չափազանց լայն մեկնաբանության եւ սոցիալական ցանցերի հասանելիության ոլորտում մարդկանց իրավունքների մոտեցումների թերություններ առնչությամբ։

Նի Օլանի կարծիքով՝ Facebook–ը բոլոր հասարակական խմբերին հավասարեցնում է ահաբեկչականին, եթե նրանց իրենց նպատակներին հասնելու համար օգտագործում են բռնությունը։

Հատուկ զեկուցողը մտահագություն է հայտնել նաեւ կապված հստակության բացակայության հետ, թե ինչ մեթոդ է կիրառում Facebook–ը, որ որոշի, թե մարդը պատկանում է այս կամ այն  խմբին։

Նի Օլանը կոչ է արել Facebook–ի փոխել «ահաբեկչության» սահմանումը եւ համապատասխանեցնել ահաբեկչության դեմ պայքարի պայմաններում մարդու իրավունքների եւ հիմնարար ազատությունների պաշտպանության հարցերով հատուկ զեկուցողի կողմից մշակված մեկնաբանության հետ։