Հարավային Կորեայի եւ ԱՄՆ-ի նախագահներ Մուն Ջեինն ու Դոնալդ Թրամփը հույս են հայտնել, որ Նյու Յորքում ՄԱԿ-ի Գլխավոր ասամբլեայի շրջանակներում կքննարկեն Հյուսիսային Կորեայի հարցը, հաղորդում է Reuters-ը` վկայակոչելով Հարավային Կորեայի նախագահի մամուլի ծառայությանը:
Այսօր երկու երկրների ղեկավարները հեռախոսազրույց են ունեցել, որը մոտ մեկ ժամ է տեւել: Վաղը Հարավային Կորեայի ներկայացուցիչները կայցելեն Փհենյան, որպեսզի քննարկեն երկու Կորեաների ղեկավարների երրորդ գագաթաժողովի նախապատրաստությունը, որը պետք է տեղի ունենա սեպտեմբերի վերջին:
Զրույցի ընթացքում Մուն Ջեինը եւ Դոնալդ Թրամփը պայմանավորվել են խորը խորհրդատվություններ անցկացնել Կորեական թերակղզու ռազմավարության եւ համագործակցության հարցերի վերաբերյալ:
Ավելի վաղ Հարավային Կորեայի ազգային անվտանգության գրասենյակի ղեկավար Չունգ Յուոնը հաղորդել էր, որ հարավկորեացի նախագահի նամակը կփոխանցի Կիմ Չեն Ընին: Չունգը նշել էր, որ ցանկանում է Փհենյանի պաշտոնատար անձանց հետ քննարկել Կորեական թերակղզու լիակատար ապամիջուկայնացմանը հասնելու ուղիները: