Ճապոնիայից գիտնականների խումբը պատրաստ է փորձարկել առաջին «տիեզերական վերելակը», գրում է «ՌԳ»-ն՝ հղում կատարելով Phys.org-ին: Սիձուոկա համալսարանի մասնագետների կողմից ստեղծված նախատիպը 6x3x3 սմ չափերով տուփ է:
Եթե ամեն ինչ ճիշտ է հաշվարկվել, ապա փոքր շարժիչի միջոցով այն կկարողանա տիեզերքում երկու արբանյակների միջեւ ձգված 10 մետրանոց մալուխով տեղաշարժվել:
Ենթադրվում է, որ նախատիպը տիեզերք կուղարկվի արդեն հաջորդ շաբաթվա ընթացքում: Այն ուղեծիր դուրս կբերվի H-2B հրթիռ կրիչի օգնությամբ, որը գործարկում է Ճապոնիայի տիեզերական գործակալությունը:
Ենթադրվում է, որ նման կառույցը թույլ կտա առանց հրթիռների տիեզերք բեռ ուղարկել՝ միայն ամուր պարանի օգնությամբ, որը կկապի Երկրի մակերեւույթը եւ ուղեծրային կայանը:
Այս ուղղությամբ աշխատում է ճապոնական Obayashi շինարարական ընկերությունը, որը համագործակցում է Սիձուոկա համալսարանի հետ: Այն նախատեսում է նանոխողովակների տեխնոլոգիա օգտագործել 96 հազար կմ երկարությամբ հաստ պարան կառուցելու համար, որի օգնությամբ 30-35 տարի հետո արդեն կկարողանա մարդկանց տիեզերք ուղարկել: