Ռուսաստանն ակնկալում էր ՄԱԿ-ի Անվտանգության խորհրդում «Սկրիպալների գործով» նոր բան լսել, սակայն փոխարենը լսեց «ստի կոկտեյլ», հայտարարել է ՄԱԿ-ում Ռուսաստանի մշտական ներկայացուցիչ Վասիլի Նեբենզյան, հաղորդում է «ՌԻԱ Նովոստին»:
«Մեծ հույսեր ունեինք, որ այսօր այդ խճճված միջադեպի հետ կապված ինչ-որ համոզիչ, բացահայտող մի բան կլսենք: Ցավոք, մեր սպասելիքները նորից չարդարացան:
Այսօրվա ելույթներում մենք լսեցինք ստի նույն հավաքածուն իբրեւ թե ռուսական հատուկ ծառայությունների կողմից կրկնակի գործակալների սպանության մասին, քիմիական թունավոր նյութերի կիրառման համար ռուսական հատուկ ծառայությունների փորձերի, Ռուսաստանում մարտական թունավոր նյութերի մշակման, կիբեր հարձակումների, Մակեդոնիայում պետական հեղաշրջման փորձերի եւ էլի շատ բաներ: Ես չեմ թվարկի այդ ամբողջ անհիմն սուտ կոկտեյլը», — ՄԱԿ ԱԽ նիստում ասել է Նեբենզյան:
Ավելի վաղ ՄԱԿ-ում Մեծ Բրիտանիայի մշտական ներկայացուցիչ Կարեն Փիրսը հայտարարել էր, որ Լոնդոնը տիրապետում է Սոլսբերիում թունավորմանը Ռուսաստանի ներգրավվածության մասին ապացույցներին: «Մենք հստակ ապացույցներ ունենք ռուսական ներգրավվածության մասին, Սոլսբերիում տեղի ունեցածի եւ քիմիական զենքի կիրառման վերաբերյալ», - ասել է նա, հաղորդում է ՏԱՍՍ-ը:
Մեծ Բրիտանիան ՆԱՏՕ-ի դաշնակիցների հետ կքննարկի Ռուսաստանի դեմ հնարավոր նոր պատժամիջոցները, հավելել է Փիրսը: Նրա խոսքով, Լոնդոնն իր դաշնակիցների հետ միասին «կմտածի, թե ինչպես պետք է դիմակայել Ռուսաստանի նման անխոհեմ պահվածքին, որը սպառնում է ինչպես անհատներին, այնպես էլ միջազգային նորմերին, որոնք արգելում են քիմիական զենք կիրառել»: