Նորք-Մարաշում վնասազերծված զինված խմբի գործով ամբաստանյալներ Արա Պողոսյանն ու Գեւորգ Ջնդոյանը հրաժարվեցին հանրային պաշտպանից։ Այս մասին այսօր՝ սեպտեմբերի 9 -ին Երեւանի ընդհանուր իրավասության դատարանում հայտարարեցին ամբաստանյալները։ Պաշտպան Թամարա Բաղդասարյանը դատարան գրություն էր ուղարկել՝ տեղեկացնելով, որ մեկ ամիս գործուղման մեջ է գտնվելու եւ չի կարող ներկայանալ դատական նիստերին: Նա նաեւ խնդրել էր՝ առանց իր մասնակցության դատական նիստ չանցկացնել: Դիմումի հրապարակումից հետո Գեւորգ Ջնդոյանը հաայտարարեց, որ հրաժարվում է պաշտպանից:
«Արդեն երկու ամիս է՝ ամեն մեկն իր գործով է զբաղված, բայց մեր կյանքի ժամանակից է գնում, ընդ որում՝ անազատության մեջ եւ անհայտ ժամկետով, էստեղ կոնկրետ իմ իրավունքն է ոտնահարվում եւ դրանից ելնելով ես կարող եմ իմ իրավունքները միայնակ պաշտպանել»,-ասաց Ջնդոյանը: Նրա հայտարարությանը միացավ նաեւ ամբաստանյալ Արա Պողոսյանը։ Պաշտպաններ Ինեսա Պետրոսյանն ու Լեւոն Բաղդասարյանը նկատեցին, որ դա անձի իրավունքն է եւ գործը պետք է քննվի ողջամիտ ժամկետում: Պաշտպաններից ոմանք էլ պատրաստակամություն հայտնեցին իրականցնել Ջնդոյանի եւ Պողոսյանի պաշտպանությունը: Սակայն դատավոր Արմեն Բեկթաշյանը դիրքորոշում հայտնեց, որ պաշտպանից հրաժարումը կարող է ընդունել միայն նրա ներկայությամբ եւ այդ հիմքով հետաձգեց դատաքննությունը։
Նշենք, որ արդեն տեւական ժամանակ է՝ այս գործով դատական նիստեր տեղի չէին ունենում: Նիստերի հետաձգման մեջ պաշտպանական կողմը մեղադրում էր դատավոր Արմեն Բեկթաշյանին:
«Դատարանը բուլետնինի մեջ նիստ է սկսել, դուք տեղյա՞կ եք դրանից»,- դիմելով դժգոհող պաշտպաններին՝ վրդովված հայտարարեց Արմեն Բեկթաշյանը:
Փաստաբան Ինեսա Պետրոսյանի կարծիքով, սակայն դատարանը միտումնավոր է հետաձգում գործի քննությունը:
«Ապրիլից մինչ օրս ընդամենը երկու դատական նիստ է տեղի ունեցել, որի ժամանակ ազատ են արձակվել առողջական լուրջ խնդիրներ ունեցող ամբաստանյալներ: Դատական նիստը զանազան պատճառներով տեղի չի ունենում: Այսօր էլ ոտնահարվեցին ամբաստանյալների իրավունքները»,-NEWS.am-ի հետ զրույցում ասաց պաշտպան Ինեսա Պետրոսյանը՝ հավելելով, որ դատական նիստի վերաբերյալ ինքը եւ մի շարք այլ պաշտպաններ անգամ ծանուցումներ չեն ստացել: Նշենք, որ 2018թ. հունիսին դատարանը փոխել էր այս գործով մի քանի ամբաստանյալների՝ այդ թվում , պաշտպանության նախկին փոխնախարար Վահան Շիրխանյանի խափանման միջոց կալանավորումը: Նա ազատ էր արձակվել պատգամավորների անձնական երաշխավորությամբ:
Հիշեցնենք, որ, ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել է բռնությամբ զավթել իշխանությունը: Մասնավորապես, թռիչքի պահին խոցել նախագահի օդանավը, հարձակում գործել ՀՀ նախագահի նստավայրի, Ազգային ժողովի, Սահմանադրական դատարանի, Կառավարության, Հանրային հեռուստաընկերության եւ այլ հաստատությունների շենքերի վրա: