Թուրք կինոռեժիսորը 6 տարի 3 ամիս ժամկետով բանտարկության է դատապարտվել ֆիլմի համար, որում երկրի նախագահ Ռեջեփ Էրդողանի մահապատժի տեսարան կա:
Կինոռեժիսոր Ալի Ավչին կալանավորվել է անցյալ տարի իր՝ «Զարթոնք» ֆիլմի թրեյլերի թողարկումից հետո, որը հիմնված է 2016 թվականին պետական հեղաշրջման փորձի վրա: Թրեյլերը հանրային արձագանք է հարուցել տեսարանի պատճառով, որտեղ Էրդողանն աղոթում է՝ գլխին պահած ատրճանակի ներքո, իսկ նրա կողքին ընկած են իր ընտանիքի սպանված անդամները:
Ստամբուլի դատարանն Ավչիին դատապարտել է 6 տարի 3 ամիս ժամկետով բանտարկության՝ իսլամական քարոզիչ Ֆեթուլլահ Գյուլենի կազմակերպությանն անդամակցելու համար, որին անկարան մեղադրում է հեղաշրջման կազմակերպման մեջ: Դատարանը որոշել է, որ Ավչին իր ֆիլմի միջոցով «փորձել է ազդել հանրային ընկալման վրա ահաբեկչական կազմակերպության հիմնական նպատակներին համապատասխան»:
Ռեժիսորը մեղադրանքները հերքում է՝ հայտարարելով, որ Էրդողանն է բազմիցս հայտարարել, թե ինքն էր չհաջողված հեղաշրջման թիրախը: «Եթե ես փորձեի իրականացնել ահաբեկչական քարոզչություն, ապա ցույց կտայի, թե Էրդողանն ինչպես է ծրագրում փախչել, այլ ոչ թե աղոթքի տեսարան»,- դատարանին ասել է Ավչին: