Ռուսաստանի եւ Հայաստանի հարաբերությունները բոլոր ուղղություններով առաջընթաց զարգացում ունեն, հայտարարել է ՌԴ նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ բանակցությունների ժամանակ, հայտնում է Կրեմլի մամուլի ծառայությունը:
Կրեմլի կայքում նաեւ ասվում է, որ հանդիպման ժամանակ քննարկվել են հայ-ռուսական դաշնակցային հարաբերությունների զարգացման առանցքային հարցերը, ինչպես նաեւ համագործակցությունը եվրասիական տարածքում, մասնավորապես ԵՏՄ-ում եւ ՀԱՊԿ-ում:
Հանդիպման սկզբում ՌԴ նախագահը նշել է երկկողմ հարաբերությունների առանձնահատուկ բնույթի մասին: «Այսօրվա դրությամբ Ռուսաստանի եւ Հայաստանի հարաբերությունները բոլոր ուղղություններով առաջընթաց զարգացում ունեն: Դա վերաբերում է նաեւ քաղաքական հարաբերությունների ոլորտին, ռազմական ոլորտին, անվտանգության հարցերին, տնտեսական համագործակցությանը»,-ասել է Պուտինը՝ շեշտելով Հայաստանի ներդրումային ոլորտում Ռուսաստանի առաջնորդությունը:
Նա նշել է էներգետիկայի ոլորտում համագործակցության մասին՝ ընդգծելով Հայաստան ռուսական գազի մատակարարման ցածր գները՝ 150 դոլար հազար խմ-ի դիմաց, ինչպես նաեւ հիշատակելով ատոմային եւ ջերմային էներգետիկան:
«Ռուսաստանը վստահորեն առաջաին տեղն է զբաղեցնում Հայաստանի տնտեսական գործընկերների շարքում: Մենք հայկական տնտեսության ամենամեծ ներդրողն ենք, եւ այստեղ կարելի է նշել, որ հարաբերություններն այդ առումով բավարար չափով դիվերսիֆիկացված են:
Հարաբերությունները զարգանում են մետաղագործական արդյունաբերությունում, ընդ որում տարբեր ուղղություններով, մեքենաշինության ոլորտում: Մի խոսքով՝ մենք խոսելու բան ունենք: Հատկապես ուրախացնում է, որ նախորդ տարի ապրանքաշրջանառությունն աճել է շուրջ 30 տոկոսով, իսկ այս տարվա առաջին կիսամյակում աճը կազմել է արդեն 22,2 տոկոս: Այսինքն եթե գործերն այսպես ընթանան, մենք կգերազանցենք նախորդ տարվա ցուցանիշը:
Մեր համագործակցության ծավալը մեծ է: Ես շատ ուրախ եմ տեսնել Ձեզ, որ ներդաշնակեցնենք մեր գործունեությունը մեր ընթացիկ փոխգործակցության եւ միջինժամկետ հեռանկարի առումով»,-հավելել է Պուտինը՝ հույս հայտնելով, որ ընթացի տարում ցուցանիշների աճ կգրանցվի: