Վարչապետ Նիկոլ Փաշինյանի նորանշանակ օգնական Սոֆյա Նավասարդյանը, ում նշանակումը քննարկումների թեմա է դարձել, մինչեւ նշանակումն արդեն ուղեկցել է վարչապետի տիկնոջը Աննա Հակոբյանին պաշտոնական ուղեւորությունների ժամանակ։
Օրինակ, Սոֆյա Նավասարդյանն ուղեկցել է Աննա Հակոբյանին հունիսի 13–ին Մոսկվա կատարած այցի ընթացքում, այդ ժամանակ թերեւս վարսահարդարի կարգավիճակով։
Նշվենք, որ մամուլում շրջանառվեցին լուրեր, որ Սոֆյա Նավասարդյանը Աննա Հակոբյանի վարսահարդարն է և նշանակվել է վարչապետի օգնական, որպեսզի առավել հարմար լինի նրան տանել պաշտոնական ճամփորդությունների, որտեղ նա պետք է զբաղվի վարչապետի տիկնոջ վարսերի խնամքով:
Վարչապետի մամուլի խոսնակ Արման Եղոյանը Yerkir.am-ին հաստատել է տեղեկատվությունը, նշելով, որ Սոֆյա Նավասարդյանը վարչապետի և նրա տիկնոջ ոճաբանն է և շարունակելու է զբաղվել նույն գործով: «Նա զբաղվել և շարունակելու է զբաղվել նույն գործով, ինչ առաջ` այժմ արդեն լինելով վարչապետի օգնական: Ոչինչ չի փոխվել, ուղղակի նա նույն աշխատանքն անելու է օգնականի կարգավիճակով»,- ասել է խոսնակը:
Եղոյանը հավելել է, որ աշխարհում ընդունված պրակտիկա է, երբ երկրի ղեկավարը ոճաբան է ունենում: